Þann 10. október tóku hertar viðskiptaþvinganir Sameinuðu þjóðanna gegn Norður-Kóreu gildi. Meðal þess sem þær hafa í för með sér er að fjórum skipum, sem grunur leikur á að hafi verið notuð til að brjóta gegn fyrri viðskiptabönnum, er óheimilt að koma til hafnar hvar sem er í heiminum. Eitt skipanna hefur síðan að mestu haldið sig á sömu slóðum og siglt sama hringinn sem myndar töluna átta.
CNN skýrir frá þessu. Skipið sem um ræðir heitir Hao Fan 6 en grunur leikur á að skipið hafi verið notað við flutninga á kolum frá Norður-Kóreu til Kína en það er brot á viðskiptabanni SÞ. Grunur leikur á að hin skipin hafi verið notuð við kolaflutninga en einnig flutninga á ýmsum málmum, fiski og skeldýrum.
Daginn sem skipstjóra Hao Fan 6 var tilkynnt um bannið var slökkt á staðsetningarbúnaði skipsins og í um einn mánuð var lítið vitað um ferðir þess. Þann 13. nóvember var aftur kveikt á staðsetningarbúnaði þess. Þá kom í ljós að skipið var búið að vera undan ströndum Kína þar sem því var siglt í hringi sem mynduðu töluna átta.
Margir sérfræðingar telja skipstjórinn sigli skipinu í hringi til að reyna að rugla eftirlitsmenn í ríminu og til að reyna að koma í veg fyrir að fólk átti sig á þeirri staðreynd að skipið er enn notað til að flytja kol frá Norður-Kóreu. En líklega eru það aðeins skipstjórinn og útgerðarmaðurinn sem vita af hverju skipinu er siglt í hringi.
En ekki er ólíklegt að skipinu sé siglt í hringi því það getur hvergi farið í höfn án þess að lenda í vandræðum þar sem aðildarríkjum SÞ ber skylda til að framfylgja banninu.
Eignarhald skipsins er óljóst en CNN hefur rakið það til skúffufyrirtækis í Hong Kong sem er síðan í eigu annars skúffufyrirtækis. Þessi skúffufyrirtæki eru í umsjá fyrirtækisins SBC ásamt 400.000 öðrum fyrirtækjum. Það er því ekki annað að sjá en allt sé gert sem hægt er til að fela hið raunverulega eignarhald á skipinu.