Lögreglan á höfuðborgarsvæðinu hefur sent frá sér tilkynningu vegna máls sem hefur vakið mikla athygli í dag og DV fjallaði um í morgun. Meginefnið er áhrifamikill pistill dyravarðar í miðbænum sem segist hafa gert árangurslausar tilraunir til að fá hjálp lögreglu við að koma ungri, ósjálfbjarga stúlku í öruggt skjól. Taldi dyravörðurinn stúlkuna bera þess öll merki að henni hefði verið byrluð ólyfjan. Gagnrýndi hann lögregluna harðlega fyrir yfirlæti og sinnuleysi en þeir lögreglumenn sem hann átti samskipti við lögðu engan trúnað á að stúlkan væri undir áhrifum lyfja.

Tilkynning lögreglunnar um málið er eftirfarandi:

Nokkur umfjöllun hefur verið á frétta- og samfélagsmiðlum í dag vegna fésbókarfærslu dyravarðar um sinnuleysi Lögreglunnar á höfuðborgarsvæðinu gagnvart stúlku, sem hann taldi vera ósjálfbjarga í miðborginni aðfaranótt laugardags. Lögregla tekur slíkar ábendingar mjög alvarlega og hefur skoðað málsatvik ítarlega, en bæði var kallað eftir skýringum lögreglumanna á vettvangi og farið yfir myndefni úr eftirlitsmyndavélum á svæðinu.

Fram kemur að lögregla hafði í tvígang tal af stúlkunni og bauð fram aðstoð sína. Stúlkan kærði sig hins vegar ekki um aðstoð lögreglu og hélt loks sína leið fótgangandi úr miðborginni ásamt vinkonu. Embættið lítur svo á að lögreglumenn á vettvangi hafi brugðist rétt við, en hafa skal hugfast að í tilvikum sem þessum er gjarnan haft áfram auga með viðkomandi, þ.e. með aðstoð eftirlitsmyndavéla.

Lögreglan þakkar dyraverðinum fyrir að vekja athygli á málinu, en það sýnir að fólk er á varðbergi og stendur ekki á sama. Jafnframt harmar lögreglan að upplifun hans af samskiptum við lögreglumenn á vettvangi hafi ekki verið betri.