Aðstandendur Randy Potter, 56 ára Bandaríkjamanns, eru miður sín eftir að lík hans fannst í bifreið á bílastæði við flugvöllinn í Kansas City. Þar virðist Randy hafa setið látinn síðan hann hvarf sporlaust í janúar síðastliðnum.

Svo virðist vera sem Randy hafi svipt sig lífi en illa farið líkið fannst á bílastæði á flugvellinum í síðustu viku. Það var þann 17. janúar síðastliðinn sem tilkynnt var um hvarf Randy en leit lögreglu og fjölskyldu hans skilaði engum árangri.

Kvartað undan óþef

„Þetta er mesti sársauki sem ég hef upplifað,“ segir Carolina Potter, eiginkona Randy, í samtali við Kansas City Star. Vísar hún í það að eiginmaður hennar hafi verið látinn í allan þennan tíma á langtímabílastæði við flugvöllinn.

Það voru starfsmenn flugvallarins sem létu lögreglu vita eftir að kvartað hafði verið undan óþef frá bílnum sem er af gerðinni Dodge Ram. Carolina segir að eftir hvarf eiginmannsins hafi aðstandendur farið á flugvöllinn og athugað hvort hann hefði farið þangað. Þar hafi þeir verið fullvissaðir um að bifreið Randy væri ekki á flugvellinum – starfsmenn myndu finna bifreiðina ef svo væri.

Fengu sömu svör

„Hann var þarna allan tímann en enginn hafði fyrir því að leita. Það hefði verið hægt að finna hann miklu fyrr ef fólk hefði sinnt starfi sínu,“ segir Carolina. Aðstandendur Randy létu starfsmenn flugvallarins fá bílnúmerið en fengu ávallt sömu svör: Eftirgrennslan starfsfólks hefði leitt í ljós að bifreiðin væri ekki á flugvellinum.

„Það er erfitt að missa ástvin og tíu sinnum erfiðara að missa ástvin úr sjálfsvígi. Að vita til þess að hann hafi setið þarna í átta mánuði og bakast – ég á erfitt með að anda,“ segir Carolina við Kansas City Star. Hún spyr hversu margir hafi gengið framhjá bifreiðinni án þess að láta nokkurn vita.

Potter-fjölskyldan hefur ráðið lögmann sem mun kanna réttarstöðu fjölskyldunnar. Forsvarsmenn flugvallarins segja að rannsókn á málinu standi yfir. Þá er bent á að við flugvöllinn séu 25 þúsund bílastæði.