Logi Einarsson tekur við tímabundið – Flokkurinn fer ekki í ríkisstjórn
Oddný Harðardóttir er hætt sem formaður Samfylkingarinnar. Hún tilkynnti um þetta að loknum fundi sínum með Guðna Th. Jóhannessyni, forseta Íslands. Logi Einarsson varaformaður tekur við tímabundið en hann er eini kjördæmakjörni þingmaður Samfylkingar.
„Ég tók við sem formaður á miklum erfiðleikatímum í Samfylkingunni, tæpum fimm mánuðum fyrir kosningar. Á þeim stutta tíma tókst ekki að snúa við erfiðri stöðu flokksins og niðurstaða kosninganna er mér mikil vonbrigði, segir Oddný í tilkynningu til fjölmiðla. „Samfylkingin náði ekki árangri í þessum kosningum, en það kemur dagur eftir þennan dag og við höldum áfram. Það er afar mikilvægt að það skapist friður innan flokksins svo hægt sé að byggja starfið upp að nýju. Ég ætla að leggja mig alla fram við þá vinnu sem framundan er við að efla Samfylkinguna, því sjaldan hefur verið mikilvægara en nú að rödd jafnaðarmanna heyrist kröftuglega í íslenskum stjórnmálum og á Alþingi, segir hún ennfremur.
Að hennar mati kalli afgerandi niðurstöður kosninganna á afgerandi viðbrögð. Hún hafi því ákveðið að stíga til hliðar sem formaður Samfylkingarinnar. Þá sagði formaðurinn fráfarandi að það væri ljóst að Samfylkinginn færi ekki í ríkisstjórn. Flokkurinn myndi þó styðja öll góð mál og gæti hugsað sér að verja umbótastjórn falli.