„Kirkjan hefur passað sig mjög í Mexíkó í gegnum árin að tala ekki gegn stjórninni og ráðamönnum, hvað þá spillingu. Þegar Páfinn kemur, þá er hann að fara inn í menningu sem kann ekki að meta gagnrýni,“ segir Kevin Appleby formaður alþjóðlegu landflutningastofnunarinnar (International Migration Policy Center) í New York í samtali við Los Angeles Times. Segir Appelby að miklar líkur séu á að allir sem vettlingi geti valdið í Mexíkó munu fylgjast með heimsókn Frans Páfa nú um helgina.

Frans Páfi situr sjaldnast á skoðunum sínum en hann vakti mikla athygli í september síðastliðnum þegar hann hélt ræðu yfir bandaríska þinginu, hvatti Páfi til mannúðlegrar meðferðar á flóttamönnum, að vopnaviðskiptum verði hætt og að Bandaríkjamenn þurfi að taka loftslagsbreytingar alvarlega. Hefur Páfi kallað ráðamenn sem styðja ekki menntun „gagnslausa“ og í Kenía kallaði hann fátækrahverfin „nýlendustefnu í nýrri mynd“. Frans Páfi hefur einnig gagnrýnt eigin kirkju og sagði bókstafstrúarmenn innan kaþólsku kirkjunnar vera „sjúka“.

Mexíkó á við mikinn vanda að etja og er ljóst að margir munu hlusta þegar Páfi heimsækir Ciudad Juarez á miðvikudaginn næsta, en þar hefur átt sér stað mikið ofbeldi tengt fíkniefnaviðskiptum. Í myndbandi sem Páfi sendi mexíkósku þjóðinni í vikunni sagði hann meðal annars: „Mexíkó ofbeldisins, Mexíkó spillingarinnar, Mexíkó glæpagengjanna, það er ekki landið sem hin helga móðir vill sjá. Ég, að sjálfsögðu, mun ekki þagga það niður,“ sagði Frans Páfi.

Humberto Roque Villanueva stjórnarþingmaður í Mexíkó sagði þrisvar sinnum á blaðamannafundi í vikunni að stjórnin væri ekki hrædd við Páfann. „Ég segi það skýrt að orðið ótti er ekki til innan ríkisstjórnarinnar,“ sagði Humberto.