„Þessar hótanir halda alltaf áfram og hann er ekkert að hætta. Hann á langa sögu af því að beita ofbeldi og hefur hingað til komist upp með það. Ég er því hrædd um að þetta sé ekkert að hætta,“ segir Ásdís Viðarsdóttir en hún býr enn við áreiti og hótanir af hálfu fyrrum sambýlismanns síns, Erlends Þórs Eysteinssonar þrátt fyrir ítrekuð nálgunarbönn og fangelsisdóm. Þá hafa sonur hennar og sambýlismaður einnig þurft að sitja undir hótunum.
RÚV greinir frá þessu en Ásdís steig fyrst fram með sögu sína í Kastljósi árið 2014. Eftir að hún sleit sambandi sínu við Erlend hefur hún mátt þola ítrekaðar hótanir og þrátt fyrir ótal nálgunarbönn hefur ofsóknum hans ekki hætt. Hann hlaut 14 mánaða fangelsdóm síðastliðið sumar fyrir ofbeldi gegn Ásdísi, ítrekuð brot á nálgunarbanni, símhringingar og textaskilaboð sem innihéldu hótanir í garð Ásdísar og fjölskyldu hennar. Hann áfrýjaði dómnum og er nú beðið úrskurðar Hæstaréttar. Aftur var sett á hann nálgunarrbann í lok ágúst eftir að hann hóf á ný að áreita Ásdísi en segir hún að það hafi þó litlu breytt.
„Ég þarf því að fara að kæra enn aftur. Hann hefur verið að hrella fjölskyldu mína. Son minn og sambýlismann sem hafa fengið sinn skerf í vetur og svo ég. Þetta eru alltaf sömu duldu hótanirnar. Það styttist í endalokin og eitthvað í þeim dúr,“ segir hún en hún óttast framhaldið þar sem að langur tími gæti liðið þar til Erlendur þarf að taka út refsingu sína.
„Við vitum nú hvernig fangelsismálin standa. Hvað gerir hann þá ef þeir staðfesta og hann hefur tíma. Fer ekki beint inn. Lætur hann þá ekki bara verða af þessum hótunum. Það er það sem maður óttast. Hvort hann ráðist gegn mér eða börnunum mínum.“
