„Í fyrstu voru þeir að gretta sig og geifla fyrir aftan mig. Svo setti einn höndina á brjóstið á mér. Mér var mjög brugðið,“ segir belgíska fréttakonan Esmeralda Labye sem varð fyrir kynferðislegri áreitni þegar hann flutti fréttir af karnivali sem fram fór í borginni Köln í Þýskalandi.

Esmeralda, sem vinnur fyrir RTBF-ríkissjónvarpsstöðina, var stödd á Alter Markt-hverfinu þegar atvikið átti sér stað. Á meðfylgjandi myndbandi má sjá þegar einn maður hefur uppi niðurlægjandi takta fyrir aftan hana. Ekki sést þegar gripið er í brjóst hennar.

Í frétt The Local kemur fram að lögreglan leiti tveggja manna í tengslum við málið.

Lögreglan í Köln hefur fengið átján tilkynningar um kynferðisbrot í tengslum við hátíðina sem hófst í gær og þá hafa 180 verið handteknir fyrir margvíslegar sakir.
Skemmst er að minnast nýársfögnuðar sem fór úr böndunum í Köln en þá tilkynntu fjölmargar konur um að menn, flestir af erlendum uppruna, hafi haft uppi kynferðislega tilburði. Lögreglan hlaut mikla gagnrýni fyrir í kjölfarið og sagði lögreglustjóri borgarinnar upp störfum.

Lögreglan hefur aukið viðbúnað sinn verulega í tengslum við hátíðina sem nú fer fram í borginni og eru nú um tvö þúsund lögregluþjónar á vakt.