Sænski kjarneðlisfræðingurinn Elina Berglund hefur þróað app sem er það fyrsta í heiminum sem hlýtur viðurkenningu sem getnaðarvörn.
„Það er ótrúlega spennandi að nú sé í boði getnaðarvörn sem er viðurkenndur valkostur og að hægt sé að nota tækni í stað lyfja,“ sagði Elina í samtali við sænska miðilinn Veckans affärer, en hún og maður hennar Raoul Scherwizl þróuðu appið sem kallast Natural Cycles.
Viðurkenningin kemur frá þýsku prófunar- og rannsóknarstöðinni Tüv Süd sem flokkar appið í lækningartækniflokk IIb. Hvers vegna skiptir það máli? Jú, sjáið til, viðurkenningin þýðir að Natural Cycles appið hefur verið prófað með klínískum rannsóknum og getur veitt getnaðarvörn á pari við getnaðarvarnarpillu, hormónalykkju og smokk.
Viðurkenningin var þó alls ekki einfalt mál fyrir Elinu og Raoul því sænska lyfjastofnunin var ekki par hrifin af tali um appið sem getnaðarvörn. Þan 25. nóvember 2015 barst þeim tölvupóstur þess efnis að innan 10 daga skyldu allar slíkar fullyrðinar á bak og burt.
„Það var virkilega erfitt. Appið var jú þróað sem getnaðarvörn,“ sagði Elina í viðtali við sama miðil sumarið 2016. Notendur appsins fengu þessi skilaboð tveimur dögum fyrir jól, og tekjur fyrirtækisins hrundu. Í kjölfarið hófst fjölmiðlaumfjöllun með hræðslufyrirsögum um að Natural Cycles reyndi að blekkja ungar varnarlausar konur – og grjóthart eftirlit lyfjayfirvalda hélt áfram.
Nú um ári síðar hafa Elina og maður hennar fengið uppreist æru – og þar er viðurkenning Þjóðverjanna lykilatriði.
Appið virkar þannig að konur mæla líkamshita sinn undir tungu á hverjum morgni og færa inn í appið. Með útreikningum getur appið þá sagt til um hvort kona er frjó eða ekki þann daginn. Þannig veit hún hvort líkur eru á þungun við óvarðar samfarir.
Yfir 150000 konur í 161 landi eru notendur Natural Cycles og klínísk rannsókn hefur sýnt fram á að appið er álíka áreiðanlegt og getnaðarvarnarpillur.
