Margrét Erla Guðmundsdóttir og Freyja Rut Emilsdóttir eiga fjölskyldufyrirtækið Í tilefni, sem einblínir á að hanna og framleiða kort til að lita, fyrir hvert tilefni. Í tilefni jólanna er fyrsta vörulínan þeirra og er þemað í ár íslenska lopapeysan, en fyrsta upplagið er í fjármögnun hjá Karolina Fund.

„Myndirnar eru handteiknaðar, ákaflega fallegar og stílhreinar, þær á eftir að lita og því er hægt að setja sinn brag á myndirnar, eða gefa þau ólituð og leyfa viðtakandanum að lita sjálfum,“ segir Freyja Rut. „Kortin eru líka mjög falleg svarthvít. Hvað er notalegra í jólastressinu en að setjast niður, lita nokkrar fallegar jólamyndir og gefa vinum og ættingjum?“

Freyja Rut og Margrét Erla eru báðar kennarar, mæður og miklar áhugakonur um hvers kyns handavinnu, handverk og hönnun. Þær útskrifuðust saman úr Kennaraháskólanum árið 2006, Freyja Rut sem textílkennari og Margrét Erla sem myndmenntakennari. Um haustið hófu þær báðar störf við Vogaskóla í Reykjavík og hafa kennt þar síðan.

Hugmyndin kviknaði í fæðingarorlofi

„Hugmyndin að kortunum kviknaði á haustmánuðum 2017. Þá vorum við báðar í fæðingarorlofi, og eins og oft áður, duglegar að skiptast á hugmyndum að skemmtilegu föndri og handavinnu. Það er fátt skemmtilegra en að föndra og skapa með börnunum sem njóta sín í sköpunargleðinni,“ segir Freyja Rut.

„En það eru ekki bara börn sem lita, það gera fullorðnir líka. Kortin okkar eru tilvalin fyrir alla litara! Auðvelt að bæta sínu „dútli“ við kortin og gera þau persónulegri.“

„Með því að versla jólakort og merkimiða í gegnum Karolina Fund hjálpar þú okkur að fjármagna fyrsta upplagið af jólakortum og merkimiðum,“ segir Freyja Rut.

Nánari upplýsingar um verkefnið má finna á https://www.karolinafund.com/project/view/1910