Okkur langar öll til að viðhalda æskuljómanum, unglegri húð og líta út fyrir að vera ungleg og í því tilviki ættum við kannski að fara að fordæmi fatahönnuðarins Vivienne Westwood og baða okkur sjaldnar, en Westwood sem er orðin 76 ára gömul, hefur lýst því yfir að hún baði sig einu sinni í viku og það valdi unglegu útliti hennar.

Eftir sýningu eiginmanns hennar, Andreas Kronthaler, á tískuvikunni í París, sagði hún að „fólk ætti ekki að þvo sér svona mikið,“ ef það vildi halda húð sinni unglegri útlits. Eiginmaðurinn bætti síðan við að Westwood baðaði sig bara einu sinni í viku og þess vegna væri hún svona geislandi.

Og hún er ekki sú eina á heimilinu sem sparar vatnið, því hann sagði jafnframt að hann baðaði sig bara einu sinni í mánuði.

„Ég þvæ bara helstu staði og dríf mig út á morgnana og oft þá fer ég bara í baðið þegar Andreas er búinn að baða sig.“

Westwood er þekkt sem mikill umhverfissinni og það er ekki bara vatnið sem hún sparar við sig. Árið 2014 í herferð fyrir Peta sagði hún að hún hefði orðið grænmetisæta, ekki bara vegna þess að kjötiðnaðurinn væri mesti mengunarvaldurinn, heldur líka vegna þess að hann sóar mestu af vatnsbirgðum okkar.