Langar þig að skipta við mig?
Ég skrifa þetta nafnlaust. Ég skrifa þetta sem móðir, faðir, sonur og dóttir. Hver erum við? Jú við erum aðstandendur geðfatlaða fólksins. Við erum búin að eiga í stanslausum baráttum við geðheilbrigðiskerfið. Við erum þau sem höfum þurft að berjast, tapa, vera reið, gráta og syrgja. Við erum þau sem þurfa að flýja heimilin sín af því að það má ekki brjóta á réttindum þess geðfatlaða. Við erum þau sem kippast til í hvert sinn sem síminn hringir, af því að við vitum ekki hvenær það komi að þessu. Við erum þau sem að þurfa reglulega að hringja í lögregluna vegna þess að þessi geðfatlaði er týndur. Við erum þau sem að tökum á móti öllum ranghugmyndum sem þessi geðfatlaði fær. Við erum þau sem að horfum á þennan geðfatlaða þegar hann veit ekki lengur hvað er í gangi eða hvar hann er. Við erum þau sem eru hætt að sofa vegna þess að þessi geðfatlaði er núna orðinn heimilislaus. Við erum þau sem grátbiðja alla um aðstoð en fá hana ekki. Við erum þau sem höldum niðri í okkur andanum af stressi og sársauka, þegar einhver verður úti. Við erum þau sem örmagnast og gráta dag eftir dag. Við erum þau sem fáum að heyra að þessi geðfatlaði sé bara úrhrak Reykjavíkurborgar. Við erum þau sem fáum að gjalda fyrir vanhæfni geðdeildar. Við erum þau sem fá að heyra að geðdeild sé ekki búseta. Við erum þau sem lenda í meiriháttar vandræðum með hitt og þetta, við erum líka þau sem að elska þennan geðfatlaða og munum alltaf gera. Við erum aðstandendur.
Höfundur er 19 ára.
