Þegar hún var ófrísk var hún gagnrýnd fyrir að halda áfram að æfa og að ná að halda tónuðum magavöðvum. Hún var líka gagnrýnd fyrir að deila myndum stuttu eftir barnsburð, þar sem hún var komin í hörkuform. Töldu margir að hún væri að setja óraunhæfa pressu á aðrar mæður um að gera það sama.
En þrátt fyrir að Instagram sýndi tónaða óléttubumbu, þýðir það ekki að meðgangan hafi verið fullkomin og Duncan ætlast ekki til að aðrar konur eigi fullkomna meðgöngu heldur. Nýlega deildi Duncan mynd á Instagram sem er ekkert svo fullkomin.
Duncan sem gekk með annað barn sitt þegar hún póstaði myndinni útskýrði að á fyrri meðgöngunni hefði hún glímt við mikinn bjúg og verki, en á seinni meðgöngunni væri hún alveg laus við það vandamál.
„Skapa fótafobíu með þessum pósti,“ skrifaði Duncan á Instagram, „en hann sýnir hversu mikill bjúgurinn var undir lok fyrri meðgöngunnar. Á seinni meðgöngunni hef ég ekki gert neitt öðruvísi en á þeirri fyrri, en samt. Jafnvel ofurfyrirsætur fá bólgna fætur og aðra miður skemmtilega fylgikvilla meðgöngunnar. Það er ekki hægt að koma í veg fyrir þá, það er ekki hægt að ákveða hverjir þeir verða og það er alveg sama hversu góðu formi þú ert í, þú getur samt átt við erfiðleika að stríða á meðgöngunni.“
Þó að bjúgurinn hafi verið fjarri á seinni meðgöngunni þá glímdi Duncan aftur við verki í rifbeinum, sem líktust vöðvakrampa.
„Um leið og ég sest niður í of langan tíma byrjar verkurinn og helst stöðugur allan daginn. Þannig að ég reyni að standa eða liggja sem mest til að koma í veg fyrir verkinn.“
Á fyrri meðgöngunni fór hún í nálastungumeðferð og nudd til að reyna að losna við bjúginn.
Hún þurfti ekki á slíku að halda á seinni meðgöngunni, en eina sem hún gerði öðruvísi var að hún fór í Pilates. „Ég furða mig á hvað meðgöngurnar eru ólíkar,“ segir hún og vonar að með póstinum, sjái aðrar ófrískar konur að þær eru ekki þær einu sem njóta ekki meðgöngunnar frá a til ö. Hún vonast líka til að fólk hætti að gagnrýna að konur haldi áfram að æfa á meðgöngu. Hún segir engu að síður að það sé munur á viðbrögðum fólks í dag og þegar hún gekk með fyrra barn sitt.
„Ég vildi óska að fólki finnist „virk meðganga“ eðlileg og líti á hana sem heilbrigðan, en ekki sjálfelskan valkost tilvonandi móður.“ Við tilvonandi mæður sem finnst þær ekki vera upp á sitt allra besta á meðgöngunni segir Duncan: „Ekki vera hörð við þig þó þú elskir ekki alltaf að vera ófrísk. Mundu að þú ert að skapa líf, það eitt og sér er stórkostlegur árangur.“
