Þeir eru ófáir Íslendingarnir sem leigja íbúðir sínar út á AirBnB yfir sumarið og margir leggja sig fram um að vera góðir gestgjafar.

Á Facebook síðunni Bakland ferðaþjónustunnar upphófust fyrir nokkru umræður um hvaða heilræði væri best að gefa erlendum ferðamönnum sem vilja njóta þess að vera hér án þess að fara á hausinn.

Sérfræðingar í innlendri ferðaþjónustu sátu ekki á svörum en hér eru nokkur þeirra.

1.

Ekki kaupa í matinn í klukkubúðum, á bensínstöðvum og í sjoppunum. Þar er oft tvöfalt verðlag miðað við lágvöruverðsbúðina hinum megin við götuna.

2.

Sleppið vínkaupum á veitingahúsum. Áfengið margaldar verðið í reikningnum.

3.

Skipuleggðu ferðalagið tímanlega og reyndu að panta ferðir og upplifanir frá einu og sama fyrirtækinu upp á það að fá magnafslátt.

4.

Berðu saman verð ferðaþjónustufyrirtækja á Gullfoss og Geysi. Kannski er bara betra að borga örlítið meira fyrir fámenna ferð í lítilli rútu?

5.

Berðu saman verðin í minjagripaverslunum. Sama varan getur kostað mismikið eftir því hvar hún er seld í bænum.

6.

Það er hægt að kaupa afsláttarhefti á 1500 krónur á flestum hótelum og á bensínstöðvum víðsvegar um landið. Þar er að finna mikið af afsláttarmiðum sem ferðamenn geta nýtt sér.

7.

Verið dugleg að biðja um staðgreiðsluafslátt. Það er jafnvel líklegra að hann fáist ef það er staðgreitt með reiðufé, með erlendum gjaldmiðli.

8.

Drekktu alltaf vatn úr krananum og fylltu á flöskur.

9.

Ekki að greiða eldsneyti í sjálfsölum. Ef þú velur „fylla“ er tekið 25 þúsund á flestum stöðum af kortinu þínu sem síðan er lagfært ef þú dælir svo bara fyrir níu þúsund. Það tekur nokkra daga að fá lagfæringuna í gegn.

10.

Ekki kaupa íslenskt sælgæti í umbúðum með áletrun á ensku.