Hinn 19 ára gamli Christian Burrows vann hugi og hjörtu dómara í áheyrnarprufum fyrir bresku X Factor þættina nú á dögunum. Söng hann þar frumsamið lag byggt á erfiðri persónulegu reynslu. Þegar hann hafði lokið flutningum átti dómnefndin vægast sagt erfitt með að halda aftur af tilfinningum sínum.

„Ég er með lag um bróður minn sem dó þegar ég var lítill. Þetta er lag er mér allt. Bara mamma hefur fengið að heyra það. Ég held aðég sé tilbúinn að flytja það,“ sagði Christian áður en hann hóf flutning sinn á laginu sem ber nafnið Thunder Bird.

Í samtali við Mirror segir Christian að litli bróðir hans hafi verið aðeins þriggja mánaða gamall þegar hann lést úr vöggudauða. Þegar hann flutti lagið í fyrsta skipti fyrir framan foreldra sína hafi það hins vegar tekið svo á þau að hann lofaði að spila það ekki aftur. Í áheyrnarprufunni þurfti hann hins vegar að velja nýtt lag til að flytja á staðnum og kom þá lagið Thunder Bird upp í hugann. Hann ákvað því næst að taka sénsinn.

Óhætt er að segja að þessi skyndiákvörðun Christian hafi borgað sig margfalt en hann hlaut umsvifalaust fjögur já frá dómnefndinni eftir að hann hafði lokið flutningum.

„Þú sýndir mikinn kjark með þessum flutningi vegna þess að þetta lag er svo persónulegt. Ég veit ekki hvernig þú fórst að þessu en það er mikilvægt að þú lést vaða vegna þess að þetta sýndi mér hver þú ert sem listamaður og sem persóna. Og þú ert virkilega hæfileikaríkur,“ sagði Simon Cowell meðal annars.

Hér má sjá frammistöðu Christian.

[youtube https://www.youtube.com/watch?v=o_bmQyYaCyM?list=PLLJQHjmJHb1p8MDT36T0xt8Z8nU_q22_y&w=600&h=480]