„Ég er að leita að kærasta. Ég hef verið einhleyp í 23 ár, það er síðan ég fæddist, og mig langar að sanna fyrir foreldrum mínum að það sé ekki eitthvað alvarlegt að mér,“ segir Kristín Ólafsdóttir í pistli í Fréttablaðinu sem vakið hefur mikla athygli. Þar óskar Kristín eftir kærasta en ekki er þó allt sem sýnist.
Kærastin þarf að vera ýmsum kostum búinn, myndarlegur og gáfaður og nauðsynlegt að hann sýni því skilning þó hún vilji fara á tónleika með One Direction sem er jú heitasta bandið hjá ungu kynslóðinni. Þá krefst Kristín þess að kærastinn sé heilsuhraustur og hugrakkur.
„Hann þyrfti raunar helst að vera u.þ.b. 35 árum eldri en ég og eiga íbúð, 100% skuldlaust. Mér, ungum öreiga á hugvísindasviði, virðist nefnilega ekki ætlaður sá munaður að kaupa fasteign áður en ég dey. Kærastinn minn verður auk þess að vera hátekjumaður, til dæmis verkfræðingur eða bankastjóri, svo að hagsmuna annars okkar sé alveg örugglega gætt,“ segir Kristín ennfremur og bætir við að mikil gæfa sé ef hann sé kvótakóngur sem geti hjálpað til svo hún geti greitt niður námslánin. Kristín lýkur pistli sínum, sem ætti nú ekki að fara framhjá neinum, að sé ádeila á stöðu ungs fólks í dag á þessum orðum:
„Kærasti óskast: 23 ára, ljóshærð og lífsglöð kona í BA-námi í íslensku leitar að hraustum, sextugum kvótakóngi. Eigið húsnæði er skilyrði. Svara öllum skilaboðum. Öllum. Framtíð mín er í húfi.“
