„Þetta norm er ekkert rosalega frábært fyrir alla. Og ekki fyrir mig. Það er búið að vera mikil vinna að reyna falla inn í þetta norm. Núna er ég kominn á þann stað í mínu lífi að ég ætla að sleppa tökunum á því, og koma út úr skápnum. Allt mítt líf er ég búinn að reyna að vera einhver annar en ég er,“ segir Sauðkrækingurinn Daníel Þórarinsson en hann kemur út úr skápnum í einlægu og opinskáu myndskeiði sem fengið hefur sterk viðbrögð. Hann segir það skipta öllu máli að líða vel í eigin skinni. Sjálfur hafi hann glímt áralanga baráttu við eigin tilfinningar. Þá vill gjarnan hjálpa öðrum sem þurfa styrk til þess að horfast í augu við sjálfa sig.

Yfir 17 þúsund manns hafa horft á meðfylgjandi myndskeið sem Daníel birtir á fésbókarsíðu sinni auk þess sem hátt í 200 manns hafa deilt því áfram. Þá hafa yfir hundrað manns ritað athugasemd við myndskeiðið þar sem Daníel er hrósað óspart fyrir einlægni sína og hugrekki.

„Ég vildi óska þess að allir fylgdu hjartanu sínu og hjálpuðust að við gera góðan heim betri,“ ritar Daníel við myndskeiðið en þar segir hann meðal annars. „Ég er að opna mig með mínar tilfinningar sem hljóða þannig að ég fæddist aðeins öðruvísi en flestir aðrir.

Hvað er að vera öðruvísi? Það er einmitt málið. Maður er nefnilega alltaf að passa sig að vera ekki öðruvísi, heldur falla inn í þetta norm,“ segir hann síðan og bætir við að hann hafi miklað það of mikið fyrir sér að koma út úr skápnum fyrir framan nánustu fjölskyldu og vini fyrir nokkrum vikum. Þegar á hólminn var komið reyndist það síðan vera mun minna mál og bentu þau Daníel á að það sem skiptir mestu máli sé að líða vel í eigin skinni. Því er hann hjartanlega sammála.

„Ég er bara eins og ég er. Ég breyti mér ekki. Og af hverju ætti maður að breyta sér fyrir einhverja aðra?,“ segir hann en hann segir það jafnframt afar sárt að sjá fólk ákveða að fara fyrr úr þessum heimi vegna þess að það hefur ekki getað borið tilfinningar sínar.

„Þetta er svo einfalt þetta líf. bara ekki flækja það. Það er algjör óþarfi.“

Hann er núna tilbúinn til að hjálpa öðrum og hvetur fólk til að hafa samband við sig, jafnvel þó það þekki hann ekki neitt.

„Ef þið eruð með einhverjar svipaðar tilfinningar, eitthvað sem þið viljið vinna í: finnið styrkinn ykkar. Hvar sem hann er geymdur. Af því að hann er ótrúlega magnaðar þessi styrkur.“