Leitarbúnaður á vegum Airbus er búinn að nema merki í Miðjarðarhafinu þar sem farþegaþota EgyptAir brotlenti í síðustu viku á leið frá París til Kaíró. Allir 66 farþegar vélarinnar eru taldir af.

Egypska fréttastofan Al Ahram greindi frá þessu í gærkvöldi. Þar segir jafnframt að merkin komi frá neyðarsendi vélarinnar og segi aðeins til um staðsetningu. Hann er ekki tengdur svarta kassanum sem gefur töluvert meiri og nákvæmari upplýsingar um afdrif vélarinnar.

Leitin hefur verið afmörkuð við töluvert minna svæði en áður, eða fimm kílómetra radíus. Vonir eru bundnar við að flakið finnist á næstu dögum. Hingað til hefur aðeins brot úr flaki vélarinnar, farangri og líkamsleifum farþega fundist. Aðstandendur farþeganna hafa síðustu daga gefið DNA sýni svo hægt sé að segja til um hverjum líkamsleifarnar tilheyra.

Næstu skref er að koma fyrir nýjum leitarbúnaði í sérútbúið skip sem á að leita neðansjávar að flaki vélarinnar.