Hinn ungi balletdansari Jack Higgins vann hugi og hjörtu dómara og áhorfenda í áheyrnarprufum fyrir Britain´s Got Talent nú á dögunum. Uppskar hann standandi lófaklapp eftir hafa flutt atriði sitt en það var ekki síður saga hans sem snerti við fólkinu í salnum.

Þessi efnilegi piltur er 14 ára gamall og kemur frá Liverpool. Ljóst er að gífurleg fagnaðarviðbrögð áhorfenda og dómara urðu honum um megn og brotnaði hann hreinlega niður við fagnarlætin. Hann viðurkenndi síðan að hann hafi orðið fyrir miklu aðkasti og stríðni í gegnum tíðina fyrir að hafa áhuga á ballett, þá einkum frá strákunum í skólanum.

„Ég hef verið kallaður ýmsum nöfnum. Ég hef verið lagður í einelti, verið kallaður hommi og sagt að dans sé fyrir stelpur og að ég dansi eins og stelpa,“ sagði hann.

Simon Cowell gaf honum þá gott ráð: „Veistu hvað hrekkjusvínin þola ekki? Þeir þola ekki þegar þú ert að standa þig vel. Ég get séð að þú ert búin að leggja hart að þér og ég óska þér til hamingju.“

David Walliams tók í sama streng. „Þetta var eins og að horfa á Billy Elliot. Þetta hreyfði virkilega við mér. Hver einasta hreyfing fólk í sér merkingu og tilfinningu.“

[youtube https://www.youtube.com/watch?v=KALp5_yy8Mg&w=600&h=422]