„Þetta eru í raun handjárn. Eins og svo margt annað sem fær fólk til þess að munstra sig um borð á vímuleiðuna. Fólk sem telur þetta vera lífið veit ekki hvað lífið er,“ segir tónlistarmaðurinn Bubbi Morthens en hann kveðst ekki styðja sölu áfengis í matvöruverslunum af ýmsum ástæðum. Sjálfur hefur Bubbi verið bindindismaður árum saman.

„Ég þarf ekki neina vímu, þarf engin efni, vakna aldrei þunnur, þarf aldrei að hafa áhyggjur af því hvort ríkið sé opið eða lokað, þarf aldrei að öskra á börnin á sunnudögum, er alltaf hundraðprósent til staðar fyrir fjölskylduna – og er flott fyrirmynd,“ ritar Bubbi í pistli á fésbókarsíðu sinni. Þá kveðst hann hissa á „frjálshyggju fólki sem telur það helstu merki um frelsi að selja eiturlyf í matvöruverslunum,“ og bætir við: „Fólk sem þarf að menga á sér heilan 1-3 í viku er nánast vorkunn.“

Bubbi segir ítök vímunnar hafa svo sterk áhrif á fólk að það eigi það til að breiða út vafasaman áróður. Menn stofni til að mynda klúbba í kringum áfengi. „Það er varla nokkur maður sem hefur orðið vímaður einu sinni um ævina sem er tilbúinn að segja: „Ég þarf þetta ekki framar. Reyndu að fá einhvern sem segir: „Ég er ekki alki“ til að hætta aldrei- hann mun færa öll rök heimsins fyrir því að víman sé vinur hans og valdi honum engum vanda.“

„Þeir einu sem láta vímugjafa frá sér fara eru þeir sem urðu svo háðir að þeir þurftu að nota vímugjafann 24-7,“ heldur Bubbi áfram. „Þeir sem halda að þeir stjórni sjálfir lífi sínu eru á röngum stað. Víman er og verður bossinn einu sinni, tvisvar, þrisvar, fjórum sinnum í mánuði, öðruvísi er ekki hægt að lifa lífinu. Þú ert við stjórn mánudag til föstudags en þú ert byrjaður að hugsa um vímuna á fimmtudegi, í það seinasta. Víman hefur þig í húsi sínu og þarf aldrei að hafa áhyggjur hvort þú mætir, aldrei,“ segir Bubbi jafnframt og bætir við að lokum. „Ég er ekki amast við neinum sem kýs að víma sig. Það er þeirra mál.“