Rúm vika er síðan leikarinn Stefán Karl Stefánsson gekkst undir aðgerð vegna krabbameins. Greindi eiginkona hans, Steinunn Ólína Þorsteinsdóttir, leikkona og ritstjóri Kvennablaðsins frá því í gær að aðgerðin hefði gengið mjög vel. Sagði Steinunn Ólína á Facebook:

„Illkynja meinið sem var í brishöfðinu reyndist eiga upptök sín í gallgöngunum, neðarlega í brishöfðinu og heitir því sjúkdómurinn gallgangakrabbamein eða cholangioarcarcinoma. Þeir náðu meininu öllu og skurðbrúnir voru hreinar af krabbameinsfrumum. Stefán mun þurfa að jafna sig í nokkrar vikur eftir aðgerðina þar sem meltingarvegurinn var endurpípaður en svo hefst svokölluð adjuvant eða fyrirbyggjandi lyfjameðferð í sex mánuði.“

Þá þakkaði Steinunn ómetanlegan stuðning og hrósaði starfsfólki spítalans:

„Við fjölskyldan erum stödd í…já, hvernig á að lýsa þessu…harkalegu umferðarslysi… sem er í heldur martraðarkenndri endurspilun oft á dag. Endurspilunum er þó aðeins að fækka og nýr veruleiki að sýjast inn í vitundina.

Það er magnað hvernig líkaminn hjálpar manni í áföllum sem þessum. Hvað það að gráta er t.d góð höfuð og sálarhreinsun. Mér finnst að grátur ætti beinlínis að vera á stundaskrá. Eða hvað geispar losa um vöðvaþreytu og kvíðahnúta.“

Stefán Karl sendi nú í kvöld línu til vina og kunningja á Facebook til að þakka fyrir stuðning, hvatningu, bréf og ótal skilaboð.

„Ég get ekki lýst því hvað þetta er að hjálpa mér mikið í bataferlinu. Ég er ekki maður mikilla skrifa núna enda orkulaus og hálfur maður en mér fannst ég verða að skrifa ykkur og fá að þakka fyrir mig innilega, samhugurinn er svo máttugt afl að mig hafði aldrei órað fyrir áhrifunum fyrr en nú þegar ég reyni það á eigin skinni,“ segir Stefán Karl og bætir við:

„Sé ykkur vonandi öll fljótlega. Kveðja, Stefán Karl“