„Ég er vægast sagt gríðarlega stressaður fyrir þessu,“ segir Atli Fannar Bjarkason, ritstjóri Nútímans, við DV. Hann hefur verið ráðinn til að vera með innslög í þættinum Vikan með Gísla Marteini í vetur.

Fyrsti þáttur vetrarins fer í loftið annað kvöld klukkan 21:15.

Atli segir það hafa komið sér skemmtilega á óvart að vera boðið að taka þátt í þættinum. „Mig grunar að Gísli Marteinn hafi verið búinn að fá nóg af bröndurum um unglegt útlit sitt og ákveðið að fá eina manninn sem lítur út fyrir að vera yngri en hann, miðað við raunverulegan aldur, í þáttinn sinn,“ segir hann kíminn.

Hann segist vera mikill aðdáandi þáttarins, eins og sést hafi á Nútímanum síðasta vetur. „Það var oftar en ekki hægt að koma auga á skemmtilegt efni í þættinum og vísa í á vefnum.“

Atli viðurkennir fúslega að hann sé uggandi. „Ég er búinn að vera með krónískan magaverk í tvær vikur og er kominn upp á eitthvað nýtt stig í að efast um sjálfan mig,“ segir hann við DV.

Auk Atla mun Berglind Pétursdóttir, Berglind Festival, taka að sér stærra hlutverk og vera með innslög í þættinum eftir að hafa komið inn í ritstjórnina í fyrra.