Brandon Morrison mátti þola það á hverjum degi að vera eltur uppi af skólafélögunum sem síðan spörkuðu í hann og kýldu margsinnis. Ástæðan var sú að Brandon leit á sig sem stúlku en ekki pilt. Hún er nú orðin Brittney Kade og á sér stóra drauma fyrir framtíðina.

Brittney segist hafa vitað frá barnæsku að hún væri öðruvísi en strákarnir sem hún þá lék sér við. „Ég var held ég þriggja eða fjögurra ára þegar ég vissi að ég var ekki eins og hinir strákarnir. Mér fannst miklu skemmtilegra að leika mér með stelpudót. Ég vildi bara vera ég sjálf en ég þurfti að bæla niður allar tilfinningar mínar,“ segir hún en hún neyddist til að hætta í skóla 17 ára sökum þess að hún var aldrei látin í friði.

Hún kveðst þó vera orðin mun öruggari með sig í dag og er óhætt að segja að útlitsbreytingin sé mikil frá því að hún var Brandon. Hana dreymir um að verða fyrirsæta og ætlar sé stóra hluti á því sviði. Þá segir hún einnig þrá að finna ástina en viðurkennir að það sé ekki alltaf auðvelt fyrir transfólk að finna maka sem samþykkir þá eins og þeir eru. „Ég trúi því samt að það sé einhver þarna úti fyrir mig. Það er þó betra að vera hataður fyrir það sem þú ert heldur en að vera elskaður fyrir að vera það sem þú ert ekki.“