Breski tónlistarmaðurinn Phil Collins er tekinn saman við fyrrverandi eiginkonu sína, Orianna Cevey, aðeins nokkrum árum eftir að þau skildu. Þau voru gift í sjö ár en árið 2008 ákváðu þau að fara í sitt hvora áttina.

Tveimur árum síðar, árið 2010, greiddi Collins henni 25 milljónir punda, 4,6 milljarða króna á núverandi gengi, sem hluta af samkomulagi vegna skilnaðarins. Á þeim tíma var um hæstu upphæð í skilnaðarmáli að ræða í sögu Bretlands.

Phil Collins er 64 ára en Orianna er 42 ára. Hún lamaðist að hluta árið 2014 eftir að hún fór í aðgerð vegna brjóskloss. Í viðtali við Billboard sagði Collins að þau hefðu tekið saman fyrir sex mánuðum og raunar hefði það komið honum á óvart að enginn hefði tekið eftir því, það er fjölmiðlar.

Þau gengu í hjónaband árið 1999 og eiga tvö börn saman en fyrir átti Collins þrjú börn.