Slúðurvefsíðan TMZ fullyrðir að leikarahjónin Angelina Jolie og Brad Pitt séu að skilja. Nokkuð hefur verið slúðrað um að þetta lægi í loftinu án þess að formleg staðfesting hafi komið.

TMZ hefur hingað til verið áreiðanlegur þegar kemur að fréttum um fræga fólkið vestanhafs. Þannig greindi TMZ fyrstur miðla frá andláti Michaels Jackson á sínum tíma.

Samkvæmt frétt TMZ skilaði Jolie inn skilnaðarpappírum í gær og mun „óyfirstíganlegur ágreiningur“ vera ástæða þess að hjónin eru nú að skilja.

Jolie og Pitt eiga sex börn saman og hefur Jolie farið fram á að fá fullt forræði yfir þeim og að Pitt muni aðeins fá heimsóknarleyfi. Þá mun Jolie ekki fara fram á að fá meðlag frá Pitt vegna barnanna.

Heimildarmaður TMZ segir að Jolie hafi verið óánægð með það hvernig Pitt kom fram við börn þeirra og hvaða aðferðum hann beitti í uppeldi þeirra. Ekki er útskýrt frekar hvað það nákvæmlega var sem Jolie var óánægð með.

Angelina Jolie og Brad Pitt hafa verið saman frá árinu 2004 en þau gengu í hjónaband árið 2014.