„Einhver fingralangur meistari fékk góða næringu í hárið í kvöld.“ Þetta segir lögmaðurinn Sveinn Andri Sveinsson sem hefndi sín alrækilega á bíræfnum sjampó-þjófi sem stal sjampóbrúsanum hans úr handklæðarekkanum í baðstofunni í Word Class í Laugum fyrr í kvöld.

Það sem þjófurinn veit þó ekki er að brúsinn innihélt ekki rándýrt sjampó, líkt og umbúðirnar gáfu til kynna, heldur ilvolgt þvag lögmannsins.

Fékk nóg af fingralöngum baðstofugestum

Sveinn Andri ákvað að taka til sinna ráða eftir að hafa lent í því alloft að sjampóbrúsanum var stolið úr handklæðarekkanum við sturturnar í Laugum.

Í samtali við DV segir Sveinn Andri að hann hafi verið búinn að gefast upp á að geyma sjampóið í handklæðinu. „Ég er búinn að venja mig á að geyma þetta í töskunni sem er tómt vesen,“ segir hann og bætir við.

„Þetta er rándýrt sjampó sem maður er með. Það var örugglega búið að stela frá mér sex eða sjö brúsum áður en ég gafst upp“.

Glæpur og refsing

Sveinn Andri segir að það sé langt síðan honum datt í hug að hefna sín með þessum hætti en ákvað þó að framkvæma ekki verknaðinn fyrr en í dag þegar honum tókst loksins að klára úr brúsanum án þess að honum hefði verið stolið.

Mynd: Skjáskot af Facebook síðu Sveins Andra Sjampóþjófurinn á líklega eftir að hugsa sig tvisvar um áður en hann lætur aftur til skarar skríða.

„Af því tilefni skolaði ég hann vandlega og fyllti hann síðan af ylvolgu og vellyktandi hlandi mínu og skildi eftir í búningsklefanum.“

Sveinn Andri bætir við að þetta eigi þó að vera ágætis hárnæring. „Hver veit nema þetta eigi eftir að slá í gegn og verði góð söluvara. Framleiðslukostnaðurinn verður að minnsta kosti ekki mikill.“