Guðni Th. Jóhannesson verður settur í embætti forseta Íslands í dag. Hann flaggaði í tilefni dagsins við heimili sitt á Seltjarnarnesi en brátt mun Guðni flytjast á Bessastaði ásamt fjölskyldu sinni.

Eliza Reid, eiginkona Guðna, birti meðfylgjandi mynd á Facebook-síðu sinni þar sem hún sagði: „Í tilefni dagsins. Spennandi tímar framundan!,“ en fyrir neðan má sjá Guðna við flaggstöngina, klæddur í treyju íslenska fótboltalandsliðsins sem gerði það gott á Evrópumótinu í Frakklandi í sumar.

Guðni var kjörinn forseti með nokkrum yfirburðum þann 25. júní síðastliðinn en hann tekur við embættinu af Ólafi Ragnari Grímssyni sem lét af embætti á miðnætti.

Athöfn vegna embættistöku Guðna fer fram í Dómkirkjunni og Alþingishúsinu og hefst hún klukkan 15.30 í dag. Ríkisútvarpið verður með beina útvarpssendingu frá athöfninni í Dómkirkjunni og beina sjónvarpsútsendingu frá athöfninni í þinginu frá klukkan 15.50. Þá verður sérstökum skjá komið upp svo þeir sem staddir verða á Austurvelli geti fylgst með því sem fer fram.

Almenningur er boðinn velkominn á Austurvöll til að fylgjast með athöfninni og fagna nýjum forseta.