Fjöllistakonan og rapparinn Anna Tara Andrésdóttir er nýkomin heim úr tónleikaferðalagi um Evrópu með Reykjavíkurdætrum. Líf rappstjörnu hlýtur að vera yfir meðallagi spennandi, en rapparar eru þó bara fólk – og eiga sér drauma eins og við hin. Ef Anna Tara ætti annað líf væri það hér um bil svona:

„Ef ég ætti annað líf myndi ég vera köttur. Það hljómar kannski óspennandi. Ég gæti sagst vilja vera „superwoman“ og ætla bjarga heiminum en ég er að því í þessu lífi. Í öðru lífi myndi ég vilja algjört frí frá ábyrgð og þjáningum heimsins.

Ég öfundaði alltaf köttinn minn sem fékk að sofa þegar ég þurfti að fara í skólann. Ég myndi slaka á, borða og leika mér endalaust. Það myndi enginn kalla mig druslu fyrir að labba með rassinn stolt út í loftið, enginn bjóða mér lægri laun fyrir að vera með píku, og ég yrði ekki fyrir neinum internet árásum.

Aðrir myndu sjá um að hýsa mig og fæða mig og ég myndi einungis þurfa að pæla í sjálfri mér. Ég hefði engar áhyggjur af peningum eða hvað ég ætlaði að verða þegar ég yrði stór, hefði litlar áhyggjur af ástinni eða því að fara til sálfræðings og vera heilbrigð.

Ég væri svakalega mjúk og sæt, eða bíddu, ég er mjúk og sæt núna en allavega ég hefði engar áhyggjur, lifði fullkomlega í núinu eins og stanslaus fyrirhafnarlaus „mindfulness“ hugleiðsla. Upplifa kettir nokkuð ástarsorg eða þunglyndi? Er ekki til einhver grúppa sem er með blæti fyrir að leika ketti? Ég hlýt að tilheyra henni einhvers staðar innst inni, eða kannski ekkert svo langt inni.“