Jamie var gestur Jack Osbourne í hlaðvarpsþætti þess síðarnefnda, Trying Not to Die, á dögunum.
Í þættinum sagði Kennedy, sem er 55 ára, að honum þætti mótsagnakennt þegar leikarar og tónlistarmenn nýttu sér „rauðu dreglana“ á hinum ýmsu hátíðum til að vara við „fasísku stjórnarfari“ á sama tíma og þeir væru sjálfir undir vernd öryggisvarða flestum stundum.
„Þegar þú ert með leikara á rauða dreglinum á verðlaunahátíð sem segir hluti eins og „við erum undir fasísku stjórnarfari“ og talar um einræði, þá gæti viðkomandi varla verið meira veruleikafirrtur,“ sagði Kennedy í þættinum.
Hann bætti við að slíkar yfirlýsingar stæðust illa skoðun miðað við aðstæður þeirra sem létu þær falla. „Þú getur ekki sagt að þú sért undir einræðisstjórn þegar þú ert bókstaflega sjálfur að hegða þér á einræðislegan hátt,“ sagði hann.
Í viðtalinu vék Kennedy einnig að mótmælum gegn ICE og sagði þau að sínu mati undarleg í ljósi þess að stofnunin starfaði samkvæmt gildandi lögum. Hann hélt því fram að umboðsmenn ICE væru að reyna að losa Bandaríkin við glæpamenn. „Við skulum fylgja þeim lögum sem við höfum,“ sagði hann.
Þá hvatti hann fræga einstaklinga sem eru ósáttir við stofnunina til að fara í fremstu víglínu og beita sér sjálfir, í stað þess að gagnrýna kerfið frá kvikmyndahátíðum og öðrum viðburðum í einskonar lúxusumhverfi.
Ummæli Kennedys koma í kjölfar þess að nokkrir þekktir listamenn hafa opinberlega gagnrýnt ICE undanfarið. Á Independent Spirit verðlaunahátíðinni nýverið vakti leikkonan Natasha Rothwell, sem er hvað þekktust úr þáttunum The White Lotus, athygli þegar hún lét í ljós harða andstöðu við stofnunina.
Fleiri listamenn, þar á meðal tónlistarfólkið Billie Eilish og Bad Bunny, hafa einnig gagnrýnt störf ICE á undanförnum misserum og kallað eftir breytingum á framkvæmd innflytjendamála í Bandaríkjunum.
