Myrkrahöfðinginn, breski þungarokkarinn Ozzy Osbourne, lést 22. júlí síðastliðinn, 76 ára að aldri. 

Dánarorsök Osbourne var kunngerð í dag, en hann lést úr hjartaáfalli. 

Samkvæmt dánarvottorði lést Osbourne úr „hjartastoppi utan sjúkrahúss“ og „bráðu hjartadrepi“, þar sem kransæðasjúkdómur og Parkinson eru skráð sem undirliggjandi þættir.

Dóttir Osbourne, Aimee, skilaði dánarvottorði til skráningar í London.

Fjölskylda Osbourne greindi frá andláti hans í tilkynningu. Greint var frá því í fréttum að sjúkraþyrla hefði verið sent á heimili Osbourne og viðbragðsaðilar reyndu lífgunartilraunir í tvær klukkustundir. 

Osbourne glímdi við ýmsa heilsukvilla árin fyrir andlát sitt, í janúar 2020 var hann greindur með Parkinson. Ítrekaði hann að í því feldist enginn dauðadómur. Ári áður datt hann á heimili sínu og þurfti í aðgerð á hálsi. Árið 2023 þurfti hann að hætta við fjölda fyrirhugaðra tónleika vegna heilsuleysis.

Osbourne náði að sýna aðdáendum sínum hvers hann var megnugur stuttu fyrir andlát sitt þegar hann og meðlimir Black Sabbath komu saman 5. júlí síðastliðinn á Villa Park leikvanginum í heimaborg þeirra Birmingham. Osbourne þurfti að vísu að sitja meðan á tónleikunum stóð en um sannkallaða stórtónleika var að ræða með fjölda gestasöngvara.