„Að borða hægt er vanmetnasta verkfærið fyrir fitutap. En jafnframt eitt það einfaldasta og aðgengilegasta og þú getur haldið þig við,“ segir Ragnhildur Þórðardóttir, betur þekkt sem Raga Nagli.

Hún útskýrir málið í nýjum pistli á Facebook, en pistlar hennar um heilsu á mannamáli hafa notið mikilla vinsælda um árabil.

Ragnhildur er sálfræðingur með áherslu á heilsusálfræði og lærður einkaþjálfari.

„Sama hvað þú ert að gúlla í ginið, hvenær þú borðar, hvar þú ert staddur í veröldinni, eða með hverjum þú snæðir. Rannsókn sýndi að borða hægar er mjög áhrifarík aðferð til að draga úr hitaeininganeyslu,“ segir hún og fer nánar út í rannsókina í pistlinum sem má lesa hér að neðan.

„Það er sorglegt að við eyðum fleiri klukkustundum, jafnvel sólarhringum og dögum í að hugsa um mat. Versla hráefni. Elda matinn. Skera. Preppa. Undirbúa. Leggja á borð. Ganga frá eftir mat. En sjálf athöfnin að borða. Athöfnin sem við öll elskum. Athöfnin sem við erum búin að vesenast í kringum allan þennan tíma. Hún tekur innan við fimmtán mínútur,“ segir Ragnhildur og bætir við að vegna þess að maður borðar hratt þá verður maður ekki andlega saddur.

„Minningin um bragðið, lyktina, upplifunina er í þokukenndri móðu. Ef við erum ekki sálfræðilega södd né munum almennilega eftir máltíðinni þá viljum við meira. Borðum meira seinna. Fáum okkur slikk og sukk. Því í sálinni er óuppfyllt tómarúm.“

Góð ráð

Ragnhildur gefur nokkur ráð til að hægja á sér í máltíð fyrir betri upplifun.

• Sestu niður með disk fyrir framan þig.
• Notaðu bæði hníf og gaffal
• Skiptu í barnagaffal, t.d Tulipop. Þá tekur lengri tíma að raða matnum á gaffalinn.
• Ekki nota gaffal eins og skóflu til að moka upp í þig.
• Leggðu frá þér hnífapörin um leið og þú hefur stungið bita upp í þig.
• Taktu sopa af vatni milli bita.
• Prófaðu að tyggja mun hægar en þú ert vanur. Ímyndaðu þér að þú sért kameldýr að jórtra í makindum.
• Virkjaðu skynfærin. Veltu fyrir þér matnum á disknum. Bragðinu. Lyktinni. Áferðinni.
• Settu hendur undir borð meðan þú tyggur.
• Þú þarft ekki að híma yfir disknum eins og einhver muni hrifsa hann frá þér.
• Andaðu hægt frá þér. Þá finnurðu mesta bragðið.
•  Taktu upp hnífapörin þegar þú hefur kyngt og munnurinn er tómur.
• Settu þá nýjan bita á gaffalinn.
•  Þú þarft ekki að hanga á gafflinum með hvíta hnúa eins og hann muni yfirgefa þig.“