María Sigrún Hilmarsdóttir fréttakona á RÚV greinir frá því að hún sé á batavegi eftir alvarlegt skíðaslys sem hún lenti í um síðustu páska. Hún segist vera á batavegi en þó sé nokkuð enn í að hún verði söm aftur en María Sigrún segir að gangi vel á næstum vikum reikni hún með að geta snúið aftur til vinnu í október.
María Sigrún ræddi slysið við fjölmiðla í byrjun maí og greindi frá því að hún hefði verið á skíðum á Snæfellsjökli með fjölskyldu sinni þegar hún hefði dottið og þá um leið hefði snúist svo illa upp á vinstri fótinn að hún hefði ökklabrotnað og liðband og krossband í hnénu slitnað. Sagðist María Sigrún í samtali við Vísi aldrei hafa upplifað annan eins sársauka en hún hefur fætt þrjú börn.
María Sigrún fór í aðgerð á brotna ökklanum á páskadag en þá átti hún eftir að fara í aðgerð á hnénu.
Hún greinir síðan frá því í nýrri færslu á Instagram að hnéaðgerðin hafi farið fram í fyrradag. Aðgerðin hafi verið margþætt en gengið vel:
„Þar var meðal annars búið til nýtt fremra krossband úr sin sem tekið var af framan af sköflungi.“
María Sigrún segir næstu skref vera þau að á næstu vikum muni hún þurfa að styðjast við hækjur og verkjalyf samhliða markvissri endurhæfingu hjá sjúkraþjálfara. Nú 4 mánuðum eftir slysið sé hún orðin nokkuð góð af ökklabrotinu og ef allt gangi vel á næstu vikum muni hún komast aftur til vinnu um miðjan október. María Sigrún segist hlakka til þess að vinstra hnéð, sem fór svona illa í slysinu, fari aftur að virka eðlilega en það sé líklega enn nokkuð í að það gerist og það sé heldur ekki alveg öruggt:
„Ég hlakka svo til að geta beygt bæði hnén aftur, sitja á hækjum mér og snýta litlum nebbum í augnhæð. Það er ekki gefið og gæti tekið eitt ár, en þangað stefni ég.
View this post on Instagram
