Endurgerðin af kvikmyndinni The Naked Gun, eða Beint á ská eins og hún var kölluð á sínum tíma, er að slá í gegn bæði hjá bíógestum og gagnrýnendum. Sagt er að fyndnasta mynd ársins sé komin út.
Margir höfðu efasemdir þegar fregnir bárust af því að verið væri að endurvekja seríuna um Frank Drebin og lögreglusveitina þar sem leikarinn Leslie Nielsen, heitinn, sló eftirminnilega í gegn. Fyrst voru gefnir út sjónvarpsþættir árið 1982 og síðan þrjár bíómyndir á árunum 1988 til 1994 sem skörtuðu meðal annars leikurnum Pricillu Presley, George Kennedy og O.J. Simpson.
Margir töldu að húmor af þessu tagi, það er „detta á rassinn“ húmor (e. slapstick), væri einfaldlega genginn sér til húðar fyrir margt löngu. Þá hafði fólk einnig sérstaklega miklar efasemdir um að Liam Neeson myndi valda hlutverki Frank Drebin, en Neeson er fyrst og fremst þekktur fyrir hasarmyndir og drama.
En efasemdaraddirnar eru nú allar þagnaðar því að The Naked Gun, sem var frumsýnd á Íslandi í gær, er að slá rækilega í gegn. Bæði hjá bíógestum og hjá gagnrýnendum. Sagt er að um sé að ræða fyndnustu mynd ársins.
„Ein af fyndnustu myndum síðari tíma… Þetta er nákvæmlega það sem ég hef saknað í gamanmyndum,“ segir gagnrýnandinn Rachel Leishman hjá miðlinum The Mary Sue.
„Ein af djörfustu gamanmyndum í mörg ár, sem hefur uppskorið mesta hlátur sem ég hef nokkurn tímann heyrt á blaðamannasýningu,“ segir David Gonzalez hjá The Cinematic Reel.
„Þetta er mjög, mjög, mjög , mjög, mjög, mjög, mjög, mjög, mjög, mjög, mjög, mjög, mjög, mjög, mjög fyndið,“ segir William Bibbiani hjá The Wrap.
Er lofið svo gott sem einróma. Er nefnt að The Naked Gun sé í raun fyrsta stóra grínmyndin sem hafi komið út lengi. Grínið hafi verið deyjandi form í kvikmyndagerð og varla nein alvöru grínmynd gerð fyrir kvikmyndahús lengur.
Þá er einnig sagt að myndin sé engu verri en upprunalegu myndirnar. Sem og að hún gæti orðið brautryðjandi fyrir fleiri myndir af sama kalíberi. Það er að hún hrindi af stað nýrri bylgju grínmynda.
Hér á Íslandi virðist sem myndin sé einnig að vekja kátínu. Það er ef marka má umræður á Facebook grúbbunni Kvikmyndaáhugamenn.
„Naked Gun er fyndin…… svo gott að geta sagt það ég hló endalaust,“ segir einn.
„Ég urlaðist yfir henni!“ segir önnur.
Þá má einnig nefna að mikil umræða hefur skapast um ástarsamband tveggja aðalstjarna myndarinnar, Liam Neeson og Pamelu Anderson.En fyrir rúmri viku síðan byrjaði það að kvissast út að þau væru að stinga saman nefjum.
„Þetta er rómantík á fyrstu skrefum. Þetta er alvöru, það er greinilegt að þau eru hrifin af hvort öðru,“ sagði ónefndum samstarfsmaður þeirra við tímaritið People.
