Söng- og leikkonan Þórdís Björk Þorfinnsdóttir fékk ADHD-greiningu fyrir nokkrum árum og fékk í kjölfarið loksins útskýringu af hverju hún er eins og hún er. Hún segir að það hafi verið ótrúlegt að byrja á lyfjum og fann hún fyrir mikilli ró sem hún þekkti ekki áður.
Þórdís var gestur í Fókus, viðtalsþætti DV.
Hvenær fékkstu greiningu?
„Ég var náttúrulega allt of gömul. Ég var um þrítugt langar mig að segja,“ segir Þórdís.
„Þegar ég fékk greininguna fór ég bara að gráta. Ég vildi að ég hefði fengið svar fyrr, ekki hvað var að mér kannski, en útskýringu á því af hverju ég er svona. Allavega að einhverju leyti. Það var bara margt. Mér gekk vel í skóla, ég hafði kannski ekki mikla eirð í mér að læra en það var auðvelt fyrir mig og ég var heppin með það.“
Nokkrum árum fyrir ADHD-greininguna var Þórdís greind með kvíða.
„Þegar ég horfi á þetta núna þá er kvíðinn bara út af ADHD í rauninni, ég tengi það saman. Ég held að það sé líka algengt, að fólk sé greint með kvíða og þunglyndi en svo er undirliggjandi eitthvað annað vandamál sem þyrfti helst að tækla,“ segir hún.
Þegar hún horfir til baka sér hún ýmislegt í eigin fari sem bendir til ADHD.
„Það voru alveg svona tendensar, ég náttúrulega hef alltaf verið út um allt og átti erfitt með að slaka á, erfitt með að ná ró. Ég man þegar ég fattaði að það eru ekki allir með þúsund hugsanir í einu og líða eins og það sé alltaf stormur í hausnum á manni,“ segir hún.
Þórdís ræðir nánar um þetta í spilaranum hér að ofan. Brotið er hluti af nýjasta þætti af Fókus sem má horfa á hér í heild sinni, eða hlustaðu á Spotify og öllum helstu hlaðvarpsveitum.
