Þórdís, eða Dísa eins og hún er venjulega kölluð, var gestur í Fókus, viðtalsþætti DV. Í þættinum ræðir hún um móðurhlutverkið, ferilinn, Reykjarvíkurdætur og ADHD-greininguna. Brot úr þættinum má horfa á hér að neðan en smelltu hér til að horfa á hann í heild sinni.
Reykjavíkurdætur tóku þátt í Söngvakeppni sjónvarpsins árið 2022 og lentu í öðru sæti. Í kjölfarið var brjálað að gera hjá þeim, þær spiluðu á tónleikum um allt land og segir Þórdís að það hafi verið mjög skemmtilegt og gefandi tímabil.
Svo tók við smá pása hjá hópnum. Margar þeirra hafa eignast börn eftir Söngvakeppnina, sinnt ýmsum verkefnum og einbeitt sér að öðru. Þórdís segir að það hafi verið gott að taka meðvitaða pásu, enda hafði hljómsveitin verið á útopnu í mörg ár og ferðast um alla Evrópu til að spila.
„Svo erum við reyndar að fara saman til Litáen í júní að spila á hátíð í Vilníus,“ segir hún.
„Við eiginlega sögðum já því við söknum þess að túra saman, þannig við erum allar fáránlega spenntar.“
„Við erum alveg búnar að vera að ræða hvort við þurfum ekki að fara að gera eitthvað meira. Allar svona orðnar þyrstar í það að fara að búa eitthvað til, núna eftir þessa pásu. Svo finnst manni líka stemningin á Íslandi vera svona… við hugsuðum: Kannski þurfum við að fara að gera eitthvað meira.“
Aðspurð hvað hún á við segir Þórdís: „Bara, þú veist, hvernig þjóðfélagið hefur þróast. Búið að vera einhverjar mótbárur, og mikið verið að ræða feminísma og hvað sé að vera „woke“. Við vorum alveg: Já, kannski þurfum við að fara að rífa kjaft.“
Reykjavíkurdætur hafa þurft að þola mikið mótlæti í gegnum árin. Þórdís segir þær allar með þykkan skráp, ekki endilega því þær vildu það heldur hafi það gerst með tímanum.
„En það er leiðinelgt að segja það en maður verður vanur skítnum. Mér finnst það gott, því þegar maður er að gera eitthvað svona sem er í andlitinu á öllum og maður stendur á sviði eða maður er á samfélagsmiðlum, eða maður er að opna inn á annað fólk og hleypa fólki inn í líf sitt, þá verður maður að geta tekið skítnum,“ segir hún.
„Og líka þegar maður er að gera eitthvað sem er skapandi, auðvitað fíla ekki allir það sem maður er að gera og ef allir fíla það þá held ég að maður sé kannski ekkert að gera eitthvað rétt. Ég held að maður þurfi bara að taka því og það er allt í lagi. Það er frelsi í því að hugsa: Þetta skiptir ekki máli. Ég veit hvað ég vil gera, hvað ég er ánægð með og hvað ég stend fyrir. Og svo er fólk alltaf að fara að hafa einhverja skoðun á því, hvort sem hún er góð eða slæm.“
Þórdís ræðir þetta nánar í spilaranum hér að ofan. Smelltu hér til að horfa á þáttinn í heild sinni eða hlustaðu á Spotify og öllum helstu hlaðvarpsveitum.
