Toback, sem varð áttræður í nóvember síðastliðnum, var einn sá fyrsti sem spjótin beindust að í MeToo-byltingunni svokölluðu sem hófst árið 2017. Tuttugu konur báru vitni gegn honum í eigin persónu og tuttugu aðrar með myndbandsupptökum í réttarhöldunum sem stóðu yfir í sjö daga í New York.
Þar sem um borgaralegt mál var að ræða, en ekki sakamál, leiða brot hans ekki til fangelsisvistar.
Talið er að þetta séu hæstu bætur sem dæmdar hafa verið í kynferðisbrotamáli í sögu New York. Í umfjöllun Los Angeles Times árið 2018 kom fram að 395 konur hefðu sakað hann um ofbeldi á um 40 ára tímabili. 40 þeirra höfðuðu mál sem fyrr segir.
Toback er þekktur leikstjóri og var hann til dæmis tilnefndur til Óskarsverðlauna árið 1992 fyrir handritið að myndinni Bugsy. Þá leikstýrði hann myndinni Two Girls and a Guy árið 1997 sem skartaði þeim Heather Graham og Robert Downey Jr. í helstu hlutverkum.
Toback – sem sakaður var um ofbeldi af þekktum konum, þar á meðal Selmu Blair og Rachel McAdams – neitaði öllum ásökunum og hélt því fram að allt kynferðislegt samband hafi verið með samþykki beggja aðila.
Konurnar sem stefndu Toback lýstu því meðal annars að hann hefði þvingað þær í viðtöl eða áheyrnarprufur. Í þessum viðtölum eða prufum hafi hann beitt þær kynferðisofbeldi.
