Alls bárust rúmlega 800 kvartanir og beindust þær einkum að tónlistaratriði Sabrinu Carpenter á hátíðinni og klæðaburði Charlie XCX.
Sabrina, sem er 25 ára, flutti lagið Bed Chem á hátíðinni og var heldur fáklædd að mati þeirra sem kvörtuðu. Þá þótti mörgum hún ganga yfir strikið með „kynferðislegum skírskotunum“, ekki síst þegar hún fór niður á hnén fyrir framan einn af „varðmönnum breska konungsins“ sem höfðu komið sér fyrir á sviðinu.
„Dóttir mín sem er 11 ára er heltekin af henni og ég útskýrði fyrir henni, á meðan við horfðum á atriðið, að þetta væri ástæðan fyrir því að ég gæti ekki farið með hana á tónleika með henni,“ sagði til dæmis ein áhyggjufull móðir á samfélagsmiðlinum X.
„Sem faðir tveggja stúlkna, 11 og 13 ára, er ég fjúkandi reiður yfir því að þetta hafi verið opnunaratriði Brit Awards,“ sagði svo einn faðir.
Þá vakti klæðaburður Charlie XCX hneykslun sumra en hún mætti í gegnsærri blússu þar sem geirvörturnar sáust. Charlie fékk fimm verðlaun á hátíðinni.
Í frétt Mail Online kemur fram að Ofcom sé með til skoðunar hvort gripið verði til einhverra aðgerða vegna kvartananna. Myndband frá Mail Online má sjá hér að neðan.
