Fyrir viku síðan fór allt í háaloft þegar Patrik lét nauðgunarbrandara falla í beinni útsendingu. Hann spurði hlustanda hvort hann ætlaði að „mæta með botnlaust tjald“ á Þjóðhátíð í Eyjum. Samkvæmt gömlum umræðum á netinu þýðir að það að taka með sér botnlaust tjald, að varpa tjaldi yfir áfengisdauða manneskju og brjóta gegn henni. Margir vildu þá meina að Patrik væri í raun að spyrja hlustandann: „Ætlarðu að nauðga einhverjum á þjóðhátíð?“
Það var hart sótt að Patrik í Facebook-hópnum Baráttuhópur gegn ofbeldismenningu og sendu fjölmargir kvörtun á Sýn og Þórdísi Valsdóttur, forstöðumann útvarpsmiðla Sýnar.
Sjá einnig: Sótt að Patrik eftir meintan nauðgunarbrandara á FM957 – „Ummælin dæma sig sjálf, þau eru ógeðsleg“
Í samtali við DV í síðustu viku sagði Þórdís að Patrik starfaði sem verktaki hjá fyrirtækinu við að stýra Veislunni á FM957 einu sinni í viku.
„Ef ég tala fyrir mitt leyti þá er aldrei í lagi að tala um kynferðisofbeldi á léttum nótum,“ sagði hún.
„Ég vil að það komi mjög skýrt fram að ummælin dæma sig sjálf, þau eru ógeðsleg. Ég hef ekki náð í Patrik Atlason enn en mun eiga alvarlegt samtal við hann og óska eftir útskýringum á þessu. Kynferðisofbeldi er hræðilegt samfélagsmein sem á aldrei að tala um á léttum nótum, hvort sem það er í hugsunarleysi eða ekki.“
Ekki náðist í Patrik við vinnslu fréttarinnar í síðustu viku og hefur tónlistarmaðurinn ekkert tjáð sig um málið opinberlega. Hann er nú staddur erlendis ásamt kærustu sinni, Friðþóru Sigurjónsdóttur.
Í gær greindi Vísir frá því að Veislan hafi verið tekin af dagskrá FM957. Þórdís, forstöðumaður útvarpsmiðla Sýnar, vildi ekki tjá sig frekar um málið og ástæður þess að hún hafi ákveðið að taka þáttinn úr loftinu.
Endalokunum var fagnað í Baráttuhópur gegn ofbeldismenningu í gærkvöldi.
„Neiii sko, eru afleiðingar af slæmri hegðun – [hverjum hefði dottið það í hug]. Vonandi lærir einhver að orðum fylgir ábyrgð og að horfa út fyrir eigin forréttindi,“ segir ein.
„Takk fyrir Þórdís,“ segir önnur.
„Glæsilegt! Bara loksins, því miður þá sér maður þetta ekki nógu oft þar sem það er bókstaflega afleiðingar fyrir svona framkomu,“ segir ein.
Aðrir benda á næstu verkefni sem eru á dagskrá hjá Patrik, eins og að koma fram á Menningarnótt.
„Er ekki hægt að þrýsta á viðburðarstjórn menningarnætur að taka hann af dagskrá?“ spyr ein.
„Vek athygli á tveimur atriðum á Rásar 2 tónleikum á Menningarnótt, þá er súkkulaði strákurinn einnig á Bylgjutónleikunum spurning hvort að því verður,“ segir einn.
