Myndband af íslenskum hesti valsa inn á heimili hefur farið víða á internetinu. Heimiliskötturinn virðist hafa hleypt honum inn.

Myndbandið var tekið upp í Wisconsin fylki í Bandaríkjunum, á hestabýlinu I Am Glytja. Á býlinu eru sex íslensk hross og DV getur ekki betur séð að hrossið sem fór inn í húsið heiti Hrímnir.

Eigandinn, Robin, birti myndbandið á samfélagsmiðlinum TikTok. En á því sést að kötturinn starir á hestinn, sem er hikandi í fyrstu en lætur svo vaða og fer inn á heimilið.

„Ég er að fela mig til að sjá hvort að hann komi inn,“ heyrist eigandinn segja. Síðan kemur hún að honum bendir honum góðfúslega á að hann sé á vitlausum stað og vísar honum aftur inn í hesthúsið, sem er í viðbyggingu.

Í minningu föður sem tók eigið líf

Á býlinu I Am Glytja eru aðeins íslensk hross. Á heimasíðu býlisins kemur fram að tilgangur þeirra sé fyrst og fremst að gleðja fólk.

@iamglytja Will he or wont he? #Wisconsin #wisconsinlife #icelandichorse #horsesoficeland #happyfamily #iamglytja #bossmare #barndominium #breakin #horsesoftiktok #catsoftiktok ♬ original sound – Iamglytja

Faðir Robin, Sam, kenndi henni að umgangast hesta síðan hún var sjö ára gömul. Eftir að Robin giftist bætti hún sífellt fleiri íslenskum hestum við.

„Allt var gott þangað til þann 6. ágúst árið 2018 þegar Robin komst að því að Sam hafði tekið eigið líf. Það voru engin merki um að Sam væri þunglyndur eða einmana. Hann átti stóra fjölskyldu og barnabörn sem elskuðu hann. Við þetta hófust endalausar „hvers vegna“ spurningar og erfiðleikar,“ segir á síðunni.

Ári seinna ákvað Robin að koma á fót samfélagsmiðlasíðum fyrir hrossin á samfélagsmiðlum til að heiðra Sam. „Tilgangurinn er að láta þig brosa eða hlæja. Sérstaklega ef þú áttir slæman dag. Eða að slæmu fréttirnar á skjánum eru yfirþyrmandi,“ segir á síðunni.