Eftir það var ekki aftur snúið. Eygló var ástfangin upp fyrir haus og hélt áfram að heimsækja Sævar þar til hann losnaði sjö mánuðum seinna. Nú eru tíu ár liðin, þau eru trúlofuð og eiga fjögur börn.
Eygló er gestur vikunnar í Fókus, spjallþætti DV.
Horfðu á þáttinn hér að neðan eða hlustaðu á Spotify.
Fyrir rúmlega áratug, þegar Eygló var nítján ára, fékk hún allt í einu skilaboð frá Sævari.
„Hann byrjaði að senda mér skilaboð og spjalla við mig. Hann spurði hvað ég væri að fara að gera, ég sagðist vera á leiðinni í afmæli og spurði hvað með hann. Hann sagði: „Já, ég er bara búinn að sitja inni síðan 2013.““
Eygló viðurkennir að hennar fyrstu viðbrögð hafi verið: „Ókei, bæ“, en það hafi verið eitthvað við hann sem hafi látið hana vilja halda áfram að spjalla.
„Ég fór að mýkjast upp svo svakalega fyrir honum því hann var svo ótrúlega næs og skemmtilegur, við áttum svo vel saman.“
Fyrsta stefnumótið var á Litla-Hrauni og viðurkennir Eygló að hún hafi verið stressuð. Hún mætti seint og vissi ekkert hvað hún væri búin að koma sér út í. Það var allt annar hljómur í henni eftir stefnumótið.
„Hann var fallegasti maður sem ég hafði séð, það var ekki aftur snúið. Ég fór þarna út með hjartað í brókinni og stjörnur í augunum,“ segir Eygló og hlær.
Hún byrjar að lýsa þeirra ástarsögu í spilaranum í kringum mínútu 32:00.
Sævar var stuttu síðar færður í fangelsið á Kvíabryggju fyrir góða hegðun. Það var mun þægilegri heimsóknaraðstaða en hún þurfti að keyra tvo tíma aðra leiðina til að heimsækja hann. Hún gerði það samt, oftast tvisvar í viku, í sjö mánuði.
„Ég fór í allar heimsóknir sem ég mátti fara í,“ segir hún. „Hann mátti fá heimsókn einn virkan dag í viku og annað hvort laugar- eða sunnudag.“
Sævar losnaði úr fangelsi 16. júní 2015. Foreldrum Eyglóar var farið að gruna að hún væri í sambandi með einhverjum og sagði hún þeim loksins sannleikann á meðan hann sat enn inni. Þau sögðust ekki ætla að dæma áður en þau myndu hitta hann.
Það er óhætt að segja að þau hafi svo sannarlega sýnt að ást þeirra væri sönn. Nú er rúmlega áratugur liðinn, þau eru enn jafn ástfangin og hamingjusöm og hafa eignast fjögur börn, þrjá drengi og eina stúlku sem er fimm mánaða gömul.
Í þættinum ræðir Eygló um meðgöngurnar og fæðingarnar, sem voru allar gerólíkar. Hún hefur gengið í gegnum allan skalann, upplifað áfallamikla fæðingu, gengið í gegnum erfiða meðgöngu og nú með síðasta barn upplifði hún draumafæðinguna heima hjá sér, umkringd fjölskyldu.
Hún opnar sig einnig um andlega erfiðleika og sjálfsskaða. Hvernig það byrjaði þegar hún var barn, hvernig það þróaðist og hvernig hún náði bata. Eygló notar tónlistina til að tjá sig en það kom öllum á óvart þegar hún gaf út sitt fyrsta lag.
Eygló gaf út þrjár smáskífur árið 2023 og kom öllum sínum nánustu rækilega á óvart, en fyrir þetta höfðu þau aldrei heyrt hana syngja.
„Ég þori ekki að syngja fyrir framan neinn,“ segir Eygló sem viðurkennir að hún hafi velt fyrir sér út í hvað hún væri eiginlega búin að koma sér út í þegar hún gaf út fyrsta lagið.
„Ég er að gefa út lög en get ekki sungið fyrir framan fólk,“ segir hún og hlær.
„Þannig þetta er einhver súpa sem ég þarf að koma mér upp úr. Mig langaði bara svo ótrúlega mikið að gera þetta, mig hafði langað þetta svo lengi og þetta var búið að hrjá mig lengi […] Ég varð að gera þetta.“
Fylgstu með Eygló á Instagram og hlustaðu á tónlistina hennar á Spotify.
