Hús bandaríska leikarans Matthew Perry í Pacific Palisades í Los Angeles, hefur fengið nýjan eiganda. Perry fannst látinn í heitum potti á heimili sínu þann 28. október 2023.

Það er kvikmyndaframleiðandinn og fasteignamógulinn Anita Verma-Lallian sem keypti húsið fyrir 8,55 milljónir dollara. Húsið sem er 325 fermetrar og samanstendur meðal annars af fjórum svefnherbergjum hyggst Verma-Lallian nota sem sumarhús. Perry keypti húsið árið 2020 fyrir sex milljónir dollara.

Perry var 54 ára að aldri þegar hann lést og var andlátið skráð sem slys í fyrstu. Krufning leiddi í ljós að Perry lést eftir að hafa tekið mjög stóran skammt af lyfinu ketamín, sem varð til þess að hann missti meðvitund í heita pottinum og drukknaði.

Leikarinn var í meðferð við þunglyndi og kvíða þar sem hann fékk litla skammta af ketamín. Sá skammtur sem hann hafði tekið fyrir andlátið var þó langt umfram meðferðarskammt og ljóst að hann hafi fengið lyfið með ólögmætum leiðum.

Fimm manns, þar á meðal tveir læknar og aðstoðarmaður Perrys til fjölda ára voru ákærðir fyrir andlát Perry.