Bandaríski tónlistarmaðurinn og leikarinn Justin Timberlake var handtekinn í New York í gærkvöldi fyrir akstur undir áhrifum áfengis. Var leikarinn stöðvaður í Hampton-hverfinu eftir að hafa setið að sumbli með vinum á hóteli í Sag Harbor í gærkvöldi.

TMZ segir að Timberlake sé nú í haldi lögreglu og verði leiddur fyrir dómara í dag. Þegar þetta er skrifað er klukkan 09:24 í New York.

Heimildarmenn TMZ segja að Timberlake hafi yfirgefið gleðskapinn á eigin bíl klukkan 00:30 að staðartíma í gærkvöldi en verið stöðvaður af lögreglu örfáum andartökum síðar.

Timberlake er þessa dagana á tónleikaferðalagi og eru tónleikar fram undan í Chicago næsta föstudag. Þá eru fyrirhugaðir tvennir tónleikar í Madison Square Garden í næstu viku.