Þrír enskir Íslandsvinir hittust á góðgerðarsamkomu á vegum bresku krúnunnar í gær. Landsleik Englands og Íslands bar þar á góma.
Téðir Íslandsvinir eru Karl III konungur og knattspyrnustjarnan fyrrverandi David Beckham sem dvalið hafa á Íslandi og rennt fyrir laxi. Einnig söngvarinn Rod Stewart, sem var kynnir á Fegurðarsamkeppni Íslands á Broadway árið 1985. En þar tók hann lagið með Björgvini Halldórssyni.
Rod Stewart og eiginkona hans Penny veittu verðlaun í nafni góðgerðasamtakanna, sem kallast King´s Foundation. En þeim kom Karl á legg árið 1986. Lék Rod á alls oddi eins og vanalega.
„Ég og Penny erum þess heiðurs aðnjótandi að vera sendiherrar fyrir King´s Trust,“ sagði Rod en var strax leiðréttur af eiginkonu sinni. „Ansans skita!“ sagði söngvarinn en sá fljótt eftir því. „Ég hefði sennilega ekki átt að segja þetta.“
Þá rifjaði Rod upp að hafa verið sæmdur riddaratign árið 2016 og benti þá á Beckham. „Þín kemur brátt,“ sagði hann. En Beckham er einnig einn af sendiherrum góðgerðasamtakanna.
Karl fylgist vel með og spurði knattspyrnuhetjuna hvernig stæði á því að England hefði tapað fyrir Íslandi á föstudag.
„Ég held að við ættum ekkert að lesa of mikið í þetta,“ sagði Beckham í vörn. Karl tók undir það. „Þetta skiptir ekki miklu máli er það? Þetta er upphitun. Þú vilt ekki eyða öllu sem þú átt í byrjun.“
Sagðist Beckham vera sannfærður um að þetta yrði allt í lagi. „Við verðum tilbúnir. Gareth verður tilbúinn,“ sagði hann og átti við Gareth Southgate landsliðsþjálfara.
