Brynjar Níelsson lögmaður og fyrrum þingmaður Sjálfstæðisflokksins er mikill húmóristi á Facebook og kætir fylgjendur sína með færslum sínum: 

„Nú á ég við mikinn vanda að stríða. Vambarpúkinn herjar á mig með svo miklu offorsi að ég sést úr órafjarlægð. Staðan er sú að allar hreyfingar eru orðnar mjög erfiðar og get illa klætt mig í sokka,“ segir Brynjar í þeirri nýjustu og stefnir í óefni að hans sögn:

„Stefnir í að þurfa aðstoð við skeiningar nema tæknin geti bjargað mér. Tek einnig eftir því að konur eru hættar að sýna mér nokkurn áhuga og snúa bara upp á sig þegar ég reyni að daðra við þær.“

Brynjar spyr hverju er um að kenna. „Hefur kerfið brugðist mér og úrræði ekki næg fyrir menn í minni stöðu. Eða Soffíu sem sendir mig veikan manninn oft í búðir þar sem alls konar óhollustu er að finna. Kannski er ábyrgðin foreldra minna sem hafa ekki veitt mér nægt aðhald á uppvaxtarárum. Eina sem ég veit er að þetta er ekki mér að kenna. Það verður einhver annar að taka ábyrgðina á ástandinu. Ég kalla eftir að ríki og sveitarfélög taki sig taki og veiti mér þá aðstoð sem ég þarf.“