Tveir aðdáendur tónlistarkonunnar Madonnu hafa lagt fram kæru vegna þess að stórstjarnan hóf tónleika sína í New York á dögunum alltof seint. Tónleikarnir, sem fóru fram í desember á síðasta ári, áttu að hefjast kl.20.30 en söngkonan lét ekki sjá sig fyrr en tveimur klukkustundum eftir auglýstan tíma og hóf þá upp raust sína. Var tónleikunum lokið um kl.1 um nóttina vegna þessa. BBC greinir frá.

Aðdáendurnir, þeir Michael Fellows og Jonathan Hadden, halda því fram í kærunni að þeir hefðu aldrei keypt miða á tónleikana vitandi það að þeir myndu hefjast svo seint. Þeir hafi haft skuldbindingar varðandi vinnu og gagnvart fjölskyldu sinni daginn eftir og því hafi þeir þurft á fullum nætursvefni að halda.

Þeir hafa kært skipuleggjenda tónleikanna, Live Nation, og tónleikastaðinn Barclays Center fyrir rangar auglýsingar, villandi upplýsingar og svikula viðskiptahætti. Fulltrúi Madonnu og þessara aðila höfðu ekki svarað fyrirspurn BBC vegna málsins.