Í byrjun árs 2023 gaf tónlistarkonan Miley Cyrus út lagið Flowers sem síðan hefur tröllriðið vinsældarlistum um allan heim. Ætla mætti að í kjölfarið myndi stjarnan hamra járnin meðan það væri heitt. Ekki yrði þverfótað fyrir myndum af henni á samfélagsmiðlum og að hún myndi mokselja miða á tónleika um allan heim en því er öðru nær. Miley hefur haldið sig til hlés, sérstaklega á samfélagsmiðlum, og aðdáendur eru farnir að ókyrrast og velta fyrir sér hvað sé í gangi.
Úr þessum jarðvegi hefur sprottið upp sú samsæriskenning að Cyrus hafi sogast inn í sértrúarsöfnuðinn Modern Mystery School sem Íslendingurinn Guðni Guðnason stofnaði og er í forsvari fyrir. DV fjallaði ítarlega um feril Guðna árið 2016 en hann er búsettur í Japan ásamt þarlendri eiginkonu sinni og stýrir starfsemi skólans um allan heim þaðan.
Fullyrðingar Guðna um lífshlaup sitt eru ævintýralegar í meira lagi og það gildir ekki síður um sjálfan skólann en hann er sagður vera „eini skóli sinnar tegundar sem að miðli þekkingu sem er komin beint frá Sólomon konungi og sé allt að þrjú þúsund ára gömul.“
Þá fjallaði vefmiðillinn VICE ítarlega um feril Guðna og skólann árið 2021 og teiknaði þar upp ófagra mynd þar sem fullyrt var að um einskonar „költ“ væri að ræða og þar sem nemendur væru hafðir af féþúfum. Þá var rætt við fyrrverandi nemendur sem sögðust hafa verið niðurlægðir og jafnvel upplifað skrýtið kynferðislegt andrúmsloft innan veggja skólans og gengu sumir svo langt að tala um beinlínis um kynferðislega misnotkun.
Eins og með flesta orðróma nú til dags fór sagan um Miley Cyrus og skóla Guðna á flug á samfélagsmiðlum. Tiktok-notandinn Michelle setti saman myndband um málið þar sem hún birti meðal annars mynd af Cyrus ásamt tveimur meintum nemendum Modern Mystery School sem „sönnun“ þess að stjarnan hefði sogast inn í starfsemi skólans og þar með fór málið á flug.
Aðdáendur tónlistarkonunnar voru fljótir að leita eftir frekari upplýsingum og fóru á yfirsnúning við að lesa um skólann og fullyrðingar Guðna um þá leyndardóma og æviforna þekkingu sem hann og starfsmenn skólans búa yfir.
Sé leitað á netinu koma upp fjölmargar greinar um meint tengsl Cyrus við skóla Guðna og vinsælar youtube-síður hafa fjallað um málið.
Enn sem komið er hefur Miley Cyrus ekki tjáð sig um orðróminn en það hafa þó fulltrúar Modern Mystery School gert. Í færslu á heimasíðu skólans í Bretlandi í sumar er hent grín að málinu og greint frá því að Cyrus sé sögð hafa gengið til liðs við „költ. „Ég held að þau eigi við okkur“ er sagt í færslunni og vísað í youtube-myndband þar sem fjórir meðlimir skólans grínast með málið.
