Bandaríski tæknifrumkvöðullinn og auðjöfurinn Steve Kirsch sætir harðri gagnrýni eftir að hann greindi frá því á Twitter að hann hafi boðið konu, sem var með honum í flugi, yfir 14 milljónir króna fyrir að fjarlægja andlitsgrímu.

Kirsch hefur verið einn af þeim sem hefur verið hvað háværastur og áberandi í umræðunni gegn Covid bólusetningum.

„Ég er á flugi á vegum Delta núna. Manneskjan sem situr við hliðina á mér í fyrsta farrými afþakkaði 100 þúsund dollara (14,250,000 krónur) fyrir að sleppa andlitsgrímunni allt flugið,“ skrifaði Kirsch á Twitter í síðustu viku og birti mynd af sér í flugvélinni.

„Ég er ekki að djóka. Þetta var eftir að ég útskýrði að grímur virka ekki. Hún vinnur fyrir lyfjafyrirtæki.“

Kirsch hefur lengi verið stórt nafn í tæknibransanum. Hann er maðurinn á bak við ljósmúsina við upphaf níunda áratugarins. Hann stofnaði fyrirtækið Frame Technology Corp sem var keypt af Adobe árið 1995. Hann stofnaði síðan leitarvélina Infoseek sem Disney keypti af honum árið 1999.

Árið 2020 stofnaði hann rannsóknarsjóð fyrir hugsanlegar Covid meðferðir en hefur síðan þá orðið efins um bóluefnið og hefur verið sakaður um að deila villandi upplýsingum um heimsfaraldurinn á samfélagsmiðlum.

I am on board a Delta flight right now. The person sitting next to me in first class refused $100,000 to remove her mask for the entire flight. No joke. This was after I explained they don’t work. She works for a pharma company. pic.twitter.com/Q8Hwzhkmxf

— Steve Kirsch (@stkirsch) March 10, 2023

Twitter-færsla Kirsch vakti mikla athygli og sköpuðust heitar umræður við þráðinn. Margir hafa gagnrýnt hegðun hans.

„Þvílíkar hrútskýringar. Ég þori að veðja að þessi kona vildi óskað þess að hún væri með annað sæti,“ sagði einn netverji.

„Þú varst að áreita konu sem var ekki að trufla neinn, í lokuðu og litlu rými þar sem hún komst ekki frá þér… Yndislegt,“ sagði annar.

Hann hefur einnig verið kallaður „ógeð“ og „hrokafullur bjáni.“

She took off her mask as soon as the breakfast was served!!!! Because everyone knows you can’t get infected while you are eating!!

— Steve Kirsch (@stkirsch) March 10, 2023

Kirsch sagði að konan hafi fjarlægt grímuna til að borða og sagði að þar með væri öll vörn farin fyrir bý. En læknirinn Judy Melinek lagði orð í belg og sagði að grímur virki og að hann hefði átt að biðja konuna afsökunar.

For those of you debating whether “masks work” I’m going to refer you to prior threads brilliantly compiled by https://t.co/kM4pVEK43I

— Judy Melinek M.D. (@drjudymelinek) March 11, 2023

Nokkrur sögðu að þeir hefðu ekki hikað við að taka boðinu.

„Þó ég myndi POTTÞÉTT fá Covid, þá hefði ég tekið 14 milljónirnar,“ sagði einn.