Sænska söngkonan Loreen er sökuð um höfundarréttarstuld á laginu Tattoo sem spáð er góðu gengi á lokakeppni Eurovision í Liverpool í maí. Netverjar hafa farið mikinn vegna málsins en Tattoo er sagt vera keimlíkt tveimur öðrum lögum. Laglínan er sögð vera úr laginu V Plenu sem kom út árið 2005, og upphafsstefið er sagt vera stolið úr laginu Flying Free sem kom út árið 1999.

Lagið Tattoo hefur slegið í gegn en það er meðal annars vinsælasta lag Íslands á Spotify þessa stundina. Þá telja veðbankar miklar líkur á því að sú sænska standi uppi sem sigurvegari á lokakeppni Eurovision. Hún er ekki alveg ókunn góðu gengi þar en eins og frægt varð sigraði Loreen keppnina árið 2012 með laginu Euphoria.

TikTok notandinn @i_kirill_you birti myndband þar sem hann bar saman laglínu Tattoo við lagið V Plenu með Mika Newton.

@i_kirill_you @Loreen #loreen #eurovision #миканьютон #sverige #украина #евровидение #fypシ #sweden ♬ Tattoo – Loreen

Netverjar skiptast í fylkingar og sumir segja þetta vera skýrt merki um stuld segja aðrir að þetta sé vinsæl laglína sem finnst í mörgum öðrum lögum.

Twitter-notandinn @PauGranger vakti athygli á að upphafsstef lagsins er mjög líkt upphafsstefi lagsins Fyling Free með Pont Aeri.

Bueno yo dejo esta mezcla rápida que he hecho con Tattoo de Loreen y una canción de culto popular llamada Flying Free y ya me voy pic.twitter.com/KR9fF1h1oy

— 🎮 Paula G 🐧🏳️‍🌈 (@PauGranger) February 27, 2023

Eins og fyrr segir er Loreen talin sigurstranglegust í Eurovision í Liverpool í maí. Samkvæmt Eurovision World eru 40 prósent líkur á að hún muni vinna keppnina. Finnar koma næst, sigurlíkur þeirra eru 15 prósent og síðan Úkraína með 13 prósent líkur á sigri.