Valdís Ólafsdóttir keramiklistakona hannar verðlaunagrip Míuverðlaunanna í ár. Valdís lærði keramik í Myndlistaskóla Kópavogs og hefur unnið við listina síðan 2015 undir merkinu Dísa-Litlu hlutir lífsins. 

Míuverðlaunin verða veitt í þriðja sinn 14. september. „Míuverðlaunin eru til að heiðra þá sem koma að þjónustu langveikra barna á einn eða annan hátt. Einhver sem hefur hjálpað eða stutt við þig og þína fjölskyldu á erfiðum tíma. Það sem þeim finnst vera bara vinnan sín getur skipt sköpum fyrir aðstandendur langveikra barna og börnin sjálf. Hægt er að tilnefna heilbrigðisstarfsmann í hvaða starfstétt sem er, hvar á landinu sem er.“

Míuverðlaunin eru hluti af félagi sem ber nafnið Mia Magic og var stofnað af Þórunni Evu G. Pálsdóttur eftir að hún gaf út bókina Mía fær lyfjabrunn. Fríða Björk Arnardóttir kom svo inn í verkefnið og bjuggu þær stöllur til Míuverðlaunin. 

„Við Valdís hittumst á fundi í gær og eru drög að verðlaunagrip strax komin á teikniborðið. Ég get hreinlega ekki beðið eftir að leyfa ykkur að fylgjast með ferlinu í máli og myndum næstu mánuðina. Svo spennt að afhjúpa verðlaunagripinn,“ segir Þórunn Eva. 

Sigrún Þóroddsdóttir, barnahjúkrunarfræðingur á Barnaspítala Hringsins, hlaut verðlaunin 2021 og Tryggvi Helgason, barnalæknir á Barnaspítala Hringsins og Domus Medica, hlaut þau 2022.