Eitt heitasta par Hollywood, hjónin Joe Manganiello og Sofia Vergara, eru að skilja eftir átta ára hjónaband. Þetta kemur fram í tilkynningu hjónanna sem slúðurmiðillinn PageSix birti. „Við höfum tekið þá erfiðu ákvörðun að skilja,“ segir í tilkynningunni. Þar segjast þau óska eftir friði til þess að takast á við þennan breytta raunveruleika.
Það vakti mikla athygli á sínum tíma þegar leikararnir fóru að slá sér upp saman árið 2014 enda ofarlega á lista yfir kynþokkafyllstu leikara draumaborgarinnar.
Sambandið vatt hratt upp á sig en hálfu ári síðar höfðu þau trúlofast og rúmu ári síðar giftu þau sig með pompi og prakt í risastórri athöfn á Palm Beach sem helstu fjölmiðlar heims gerðu rækilega skil.
Ekki hafði verið fjallað um neina erfiðleika í hjónabandi parsins en þó hafði verið eftir því tekið að Manganiello var hvergi að sjá á myndum sem Vergara hefur birt undanfarna daga frá lúxusfríi sínu á Ítalíu þar sem hún fagnaði meðal annars afmæli sínu.
