Einhleypar konur geta nú lagt Tinder og öðrum stefnumótaforritum og skundað á Eyjafjarðarsvæðið um helgina, þar bíður nefnilega borgardrengur eftir ástinni. Sá hængur er hins vegar á að öll ætt hans verður mætt líka, í það minnsta þeir sem eiga heimangengt þessa helgina.
„Borgardrengur leitar að kvonfangi. Vel ættaður, rauðbirkinn drengur á fertugsaldri. Verður aðgengilegur á Eyjafjarðarsvæðinu. Hann er einkar vænlegur til undaneldis, með afbragðs vilja, óvenju framfallegur og hreyfingagóður. Áhugasamir geri vart við sig á ættarmóti í Funaborg aðra helgina í júlí.“
Svona hljómar auglýsing í Bændablaðinu sem kom út í gær, fimmtudaginn 6. júlí, í dálknum Einkamál.
Þetta er ekki fyrsta auglýsingin af slíkum toga sem vekur eftirtekt og hefur DV áður fjallað um minnst þrjár slíkar.
Sjá einnig: Sigurður leitar að ráðskonu til að svæfa sig á kvöldin
Sjá einnig: Íslenskir bændur leita að ástinni – „Austfirski folinn“ laus og liðugur og fertug ungfrú leitar að „dad-body“
Hringbraut fjallaði einnig um auglýsingar Bændablaðsins.
Sjá einnig: Einkamálaauglýsing vekur kátínu: „Áttu dóttur sem gengur ekki út?“
Sjá einnig: Leitar að konu í Bændablaðinu – „Eingöngu fallegar konur hafi samband“
DV hefur þó ekki hugmynd um hvort ofangreindar auglýsingar skiluðu árangri og ef svo er hvort árangurinn taldist góður kostur. Því er engin sönnun fyrir hvort virkar betur, stefnumótaforritin eða auglýsingar Bændablaðsins. Svo er auðvitað bara þessi gamla góða aðferð að mæta á næsta bar og bjóða í glas, sem að vísu er orðið rándýr aðferð á þessum síðustu og verstu. Kannski er bara vænlegast að nota allar aðferðirnar jafnt, svo eggin séu ekki öll í sömu körfu eins og máltækið segir.
